कालिका लघुवित्त संस्थामाथि राष्ट्र बैंकको अनुसन्धान

२४ भदौं, काठमाडौं । नेपाल राष्ट्र बैंकले कालिका लघुवित्त वित्तीय संस्थामाथि अनुसन्धान शुरु गरेको छ । संस्थामा करोडौं अनियमितता भएको गुनासो आएपछि राष्ट्र बैंकले अनुसन्धान थालेको हो ।

तनहूँको साजबोट शाखा कार्यालयमा ५३ जना नक्कली ऋणी खडा गरेर शाखा प्रवन्धक शर्मिला घिमिरेले कर्जा लिएको भन्दै राष्ट्र बैंकमा उजुरी परेको हो । संस्थाका निमित्त सीईओकै मिलेमतोमा अनियमितता भएको गुनासो कर्मचारीले गरेपछि अनुसन्धान शुरु गरिएको हो ।

नक्कली ऋणी खडा गरेर पैसा निकालि आपसमा भागबण्डा गरिएको पनि केही कर्मचारीको भनाई छ । साजबोट शाखा साविकको जनसेवी लघुवित्त वित्तीय संस्था अन्तरगत थियो । जनसेवी लघुवित्त कालिकामा मर्ज भएपछि उक्त शाखा पनि मर्ज भएको हो । त्यसबेला जनसेवीको सीईओ रहेका कमल खत्री कालिकाको डेपुटी सीईओ नियुक्त भएका थिए । अहिले उनले निमित्त सीईओ भएर कालिकाको नेतृत्व गरिरहेका छन् ।

तर नक्कली ऋणी खडा गरी रकम निकालेर अनियमितता भएपछि कालिका लघुवित्तमाथि चौतर्फी प्रश्न उब्जिएको छ । संस्थाबाट ऋण लिएका अरु ऋणी पनि चिन्तित बनेका छन् । राष्ट्र बैंकले अनुसन्धान शुरु गरेकाले यतार्थ बाहिर आउने अनुमान छ ।