भोलिदेखि निषेधाज्ञा खुल्ने, सडकमा जोरविजोर प्रणाली !

२४ भदौ, काठमाडौं । भोलि बिहीबारदेखि काठमाडौं उपत्यकामा जारी निषेधाज्ञा खुल्ने भएको छ । कोरोना महामारी रोकथाम गर्न निषेधाज्ञा जारी गरिएपनि जनजीवन कष्टकर बनेपछि भोलिदेखि निषेधाज्ञा खुलाउने निर्णय गरिएको हो ।

जिल्ला प्रशासन कार्यालय काठमाडौंले सार्वजनिक यातायात, व्यापार, व्यवसाय खोल्न दिने निर्णय गरेको हो । मन्त्रिपरिषद बैठक, गृह मन्त्रालयकै आदेशअनुसार निषेधाज्ञा खुलाउने निर्णय गरिएको काठमाडौंका प्रमुख जिल्ला अधिकार जनकराज दाहालले जानकारी दिए । भोलि बिहानैदेखि सार्वजनिक यातायात चल्नेछन् । तर जोर विजोर प्रणाली लागु गरिनेछ ।

सार्वजनिक यातायातसँगै निजी क्षेत्र, पसल, बजार, व्यवसाय, डिपार्टमेन्ट स्टोर पनि खुल्ने काठमाडौंका प्रमुख जिल्ला अधिकार दाहालले बताए । यातायात, व्यापार, व्यवसायबाहेकका क्षेत्रमा भने भदौ ३१ गतेसम्म निषेधाज्ञा जारी रहने छ ।

निषेधाज्ञा खुलेपनि कुन कुन क्षेत्र कसरी सञ्चालन गर्ने भन्ने बारेमा जिल्ला प्रशासन कार्यालय काठमाडौंले केही बेरमा निर्णय नै सार्वजनिक गर्ने तयारी गरेको छ । यसअघि भदौ ३ गतेदेखि जारी निषेधाज्ञा आज राती सकिदैछ ।