भारतबाट अतिक्रमित भूमिमा बसेका नेपालीलाई नागरिकता दिइने

२५ भदौ, दार्चुला । दार्चुलाको ब्याँस गाउँपालिकाले भारतद्धारा अतिक्रमित क्षेत्रमा बसेका नेपालीलाई नागरिकता दिने भएको छ । आर्थिक वर्ष २०७७/०७८ को नीति तथा कार्यक्रममा उनीहरुलाई नागरिकता दिने गाउँपालिकाले योजना अघि सारेको छ ।

सरकारले जारी गरेको लिम्पियाधुरा सहितको नयाँ राजनीतिक तथा प्रशासनिक नक्सा अनुसार उत्तर–पश्चिम छेउको नाबी, कुटी, गुञ्जी नेपालको दार्चुला जिल्लामा पर्छ । त्यहाँका बासिन्दालाई नेपाली नागरिकता दिलाउन पहल गर्ने उद्देश्य व्याँस गाउपालिकाले लिएको अध्यक्ष दीलिपसिंह बुढाथोकीले बताए ।

२०१५ सालमा भएको नेपालको पहिलो आमनिर्वाचनमा मतदान गरेका र २०१८ सालको राष्ट्रिय जनगणनामा समेटिएका नाबी, कुटी र गुञ्जीवासीले ०३५ सालमा दार्चुला जिल्ला मालपोत कार्यालयमा जग्गाको तिरो तिरेका रसिदहरू छन् । सुगौली सन्धि सन् १८१६ अनुसार लिम्पियाधुरा मुहान भएको काल अर्थात महाकाली नदी पूर्वका सबै भूभाग नेपालको हो । तर भारतले सो क्षेत्र अतिक्रमण गरी सैनिक शिविर राखेको छ ।