एसिड आक्रमण गर्नेलाई कारबाही गर्न प्रधानमन्त्री प्रतिबद्ध

२५ भदौ, काठमाडौं । महिला तथा किशोरीमाथि एसिड आक्रमण गर्नेलाई प्रधानमन्त्री केपी शर्मा ओलीले कारवाही गर्ने प्रतिबद्धता व्यक्त गरेका छन् । एसिड आक्रमणमा संलग्नलाई कारबाही गर्न अध्यादेशमार्फत तत्काल नयाँ कानुन ल्याउने र सोहीअनसार कारबाही गर्ने प्रतिबद्धता प्रधानमन्त्री ओलीले दोहो¥याएका हुन् ।

यसका लागि १५ दिनभित्र कानुन मस्यौदा गरिसक्न पनि कानून, न्‍याय तथा संसदीय मामिलामन्त्री शिवमाया तुम्बाहाङ्फेलाई प्रधानमन्त्रीले निर्देशन दिएका छन् । प्रधानमन्त्री ओलीले बिहीबार बालुवाटारमा १२ जना एसिड पीडितसँग भेट गरेका थिए । त्यस क्रममा गृहमन्त्री, कानुनमन्त्री, गृह, अर्थ र शिक्षा मन्त्रालयका सचिव, महान्यायाधिवक्ता र प्रहरी महानिरीक्षक समेतको सहभागिता थियो ।

एसिड आक्रमणमा संलग्नको सम्पत्ति रोक्का गरी त्यसैबाट उपचार खर्च र क्षतिपूर्ति भराउने, भरणपोषण गर्ने, पीडितलाई छिटो अस्पताल पु¥याएर उपचार गर्न सबैले सघाउनुपर्ने व्यवस्था कानुनमा गरिने पनि प्रधानमन्त्री ओलीले बताए ।

प्रधानमन्त्री ओलीले वीर र शिक्षण अस्पतालमा उपचारको प्रबन्ध मिलाउने र लाग्ने सबै खर्च सरकारले ब्यहोर्ने, नियमित प्रयोग गर्नुपर्ने औषधिको खर्चसमेत सरकारले गर्ने घोषणा गरेका छन् । पछिल्लो समय एसिड आक्रमणका घटना बढेपछि प्रधानमन्त्री ओलीले चाँसो दिएर यसको समाधान खोज्न पहल गरेका हुन् ।