पत्रकार वीरेन्द्र शाहका हत्या आरोपी १३ बर्षपछि पक्राउ

२५ भदौ, वीरगञ्ज । बाराका पत्रकार वीरेन्द्र साहको हत्यामा संलग्न हरेराम पटेल १३ बर्षपछि पक्राउ परेका छन् । बाराको महागढीमाई नगरपालिका–२ तेलकुवाका ४५ वर्षीय हरेराम पटेललाई प्रहरीले १३ बर्षसम्मको खोज तथा अनुसन्धानमार्फत कोल्हवी नगरपालिका–४ सपही टोलबाट पक्राउ गरेको हो ।

पत्रकार साहको हत्या आरोपमा यसअघि तीन जना पक्राउ परिसकेका थिए । १८ असोज २०६४ मा तत्कालीन नेकपा माओवादीका कार्यकर्ताको अपहरणमा परेका पत्रकार वीरेन्द्र साहको डुमरवानास्थित जंगलमा खाल्डो खनेर गाडेको अवस्थामा शव भेटिएको थियो ।

पत्रकार साहलाई हरेराम पटेल, कुन्दन फौजदार भन्ने नरेन्द्रकुमार फौजदार, राम एकवाल सहनी र मनेजर गिरी समेतका ५ जनाले अपरहण गरी हत्या गरेका थिए । उनीहरुले गोली प्रहार गरेर हत्या गरेपछि पत्रकार साहको शव जंगलमा खाल्डो खनेर गाडेका थिए ।

यसअघि पक्राउ परेका दुई जना जन्मकैद सजाय काटिरहेका छन् । तेस्रो आरोपी बारा गडहल–५ बस्ने कुन्दन फौजदार भन्ने नरेन्द्र फौजदार हाल पूर्पक्षका लागि कारागारमा छन् । पटेल चौथो आरोपीका रुपमा पक्राउ परेका हुन् ।