अमेरिकामा एक हजार चिनियाँ विद्यार्थीको भिसा रद्द

२६ भदौ, एजेन्सी । अमेरिकाले एक हजारभन्दा बढी चिनियाँ विद्यार्थीको भिसा खारेज गरेको छ । अनुसन्धानकर्ताहरूले अमेरिकाका लागि खतरा ठानिएका ती विद्यार्थीहरूको भिसा खारेज गरिएको छ ।

अमेरिकी राष्ट्रपति डोनाल्ड ट्रम्पले गत मे महिनामा चिनियाँ सेनासँग सम्बन्ध भएका चिनियाँ नागरिकलाई लक्षित गरी गरेको एउटा घोषणाअनुसार यो निर्णय गरिएको जनाइएको छ ।

केही चिनियाँ नागरिकले अमेरिकामा महत्त्वपूर्ण तथ्यांक र बौद्धिक सम्पत्ति चोरेको राष्ट्रपति ट्रम्पको दाबी छ । अमेरिकी सरकारले यस विषयमा थप जानकारी भने सार्वजनिक गरेको छैन । अमेरिकी निर्णयप्रति चीनले हालसम्म भने कुनै टिप्पणी गरिसकेको छैन ।

अमेरिकी विश्वविद्यालयहरूमा बर्सेनि हजारौं चिनियाँ विद्यार्थी भर्ना हुने गर्छन् । गत शैक्षिक सत्रमा झन्डै ३ लाख ७० हजार चिनियाँ विद्यार्थीहरू अध्ययनका लागि अमेरिका पुगेका थिए ।

ती विद्यार्थीहरूले विभिन्न विश्वविद्यालयमा स्नातक गरिरहेका र अनुसन्धाताहरू छन् । उनीहरू चिनियाँ विद्यार्थीहरूको एउटा सानो उपसमूह भएको ती अधिकारीलाई उद्धृत गर्दै बीबीसीले जनाएको छ ।

राष्ट्रपति ट्रम्पको मे २९ को घोषणामा ‘चीनले अमेरिकाबाट संवेदनशील प्रविधि र बौद्धिक सम्पत्ति हात पार्न एउटा अभियान नै सञ्चालन गरेको’ आरोप लगाइएको थियो ।