नक्कली पत्रकार खोज्ने दुई प्रहरीलाई कोरोना संक्रमण

२६ भदौ, काठमाडौं । महानगरीय अपराध महाशाखाका दुई जना प्रहरीलाई कोरोना संक्रमण पुष्टि भएको छ । नक्कली प्रेस कार्ड बनाउने व्यक्तिलाई बागबजारबाट पक्राउ गरेका दुई जना प्रहरीलाई कोरोना संक्रमण पुष्टि भएको हो ।

नक्कली प्रेस कार्ड बनाउने व्यक्तिमा कोरोना संक्रमण देखिएपछि कन्ट्याक्ट ट्रेसिङ गर्दा उनीहरुमा पनि कोरोना देखिएको हो । कन्ट्याक्ट ट्रेसिङकै क्रममा लैनचौर, बौद्ध र गौशाला वृत्तमा रहेको अपराध महाशाखा युनिटका थप पाँच जना प्रहरीलाई पनि कोरोना संक्रमण भएको पाइएको छ ।

लक्षण देखिएका केही संक्रमितलाई नेपाल प्रहरीको अस्पतालमा राखिएको छ भने केही होम आइसोलेसनमा छन् । पत्रकारको नक्कली परिचयपत्र बनाएर बिक्री गरेको आरोपमा प्रहरीले बागबजारबाट ३ जनालाई पक्राउ गरेर कारवाही अगाडी बढाएको छ ।