हप्तामा दुई दिन सार्वजनिक बिदा !

२६ भदौ, काठमाडौं । सरकारले आन्तरिक पर्यटन प्रोत्साहन गर्न हप्तामा दुई दिन सार्वजनिक बिदा दिने प्रस्ताव गरेको छ । संस्कृति, पर्यटन तथा नागरिक उडड्यनमन्त्री योगेश भट्टराईले स्वदेशी पर्यटकलाई आफ्नै देश घुम्न हप्तामा दुई दिन सार्वजनिक बिदा दिने प्रस्ताव गरेका हुन् । यो उनको प्रस्ताव मात्रै हो । यसमाथि छलफल हुन र प्रस्ताव पारित हुन बाँकी छ ।

कोरोना महामारीले पर्यटन व्यवसाय थिलथिलो भएको बेला यसलाई उकास्न दुई दिन सार्वजनिक बिदाको प्रस्ताव आएको हो । ‘सातामा दुई दिन शुक्रबार र शनिबार सार्वजनिक बिदा दिएमा अहिलेको पर्यटन बजार थप उकासिन्छ’ मन्त्री भट्टराईले भने ।

आन्तरिक पर्यटन प्रवर्द्धनको प्याकेजबाट नेपालीलाई घुमफिरमा आकर्षित गर्न सके त्यो राज्य र व्यवसायी पर्यटन फस्टाउनमा सहयोग पुग्ने होटल व्यवसायी बताउँछन् । यसका लागि होटल व्यवसायी र पर्यटन व्यवसायीसँग छलफल गरेर मन्त्रिपरिषद बैठकमा प्रस्ताव लैजाने तयारी मन्त्री भट्टराईको छ । तर मन्त्री भट्टराईका प्रस्ताव मन्त्रिपरिषदबाट कमै पारित हुने गरेका छन् ।