धनगढीमा घाइते वन्यजन्तु उद्धार तथा उपचार केन्द्र स्थापना

२६ भदौ, सुदूरपश्चिम । धनगढी उपमहानगरपालिकास्थित शिवपुरी सामुदायिक वन परिसरमा घाइते वन्यजन्तु उद्धार तथा उपचार केन्द्र स्थापना गरिएको छ । घाइते वन्यजन्तुको उद्धार गरी उपचार गर्ने उद्देश्यले उक्त केन्द्रको स्थापना गरिएको हो ।

सो केन्द्रमा अहिले एउटा चित्तल र रतुवा राखिएको डिभिजन वन कार्यालय धनगढीका प्रमुख रामचन्द्र कँडेलले बताए । “सामुदायिक वन क्षेत्रमा संरक्षित वन्यजन्तु घाइते भएमा तत्कालै उद्धार गरी केन्द्रमा ल्याएर प्राथमिक उपचार गर्छौ”, उनले भने, “स्वास्थ्य भएपछि पुनः वन क्षेत्रमा छाड्छौं।” ‘विस्तारै योे केन्द्रलाई ‘सानो स्तरको चिडियाखाना’ को रुपमा विकास गर्ने योजना रहेको पनि उनले बताए ।

धनगढी उपमहानगरपालिका र डिभिजन वन कार्यालयको सहयोगमा स्थापना गरिएको सो केन्द्रको उपमहानगरपालिकाका प्रमुख नृपबहादुर वड र डिभिजन वन कार्यालय धनगढीका प्रमुख कँडेलले संयुक्त रुपमा उद्घाटन गरे ।उद्धार केन्द्र नजिकै यस क्षेत्रकै मुख्य धार्मिकस्थल शिवपुरी धाम रहेको छ ।

यो धाममा दर्शन तथा पूजाका लागि आउने भक्तजनले निर्माण हुने ‘सानो स्तरको चिडियाखाना’ को समेत अवलोकन गर्न सक्ने बताइएको छ । शिवपुरी धामको मुख्य आकर्षक भनेको नै १०८ फिट अग्लो उत्तररामेश्वरम् ज्योतिर्लिङ्ग रहेको छ ।सो अवसरमा उपमहानगरपालिकाका प्रमुख वडले उद्धार केन्द्रलाई ‘सानो स्तरको चिडियाखाना’ को रुपमा विकास गर्न सकिएमा शिवपुरी धाममा पर्यटक भित्रियाउन थप टेवा पुग्ने विश्वास व्यक्त गरे ।

यसैबीच कैलालीको कैलारी गाउँपालिकाको बङ्गालीपुरमा फेला परेको दुर्लभ वन्यजन्तु सालकको बिहीवार उद्धार गरी नजिकैको वसन्ता वन क्षेत्रमा लगेर छोडिएको छ । साइटिस सूचिमा सूचिकृत सालक आठ किलो तौलको रहेको डिभिजन वन कार्यालयका प्रमुख कँडेलले बताए।