बाह्रबिसेमा मृत्यु हुनेको संख्या ९ पुग्यो, २२ बेपत्ता

२८ भदौ, काठमाडौं । गएराती अविरल बर्षापछि आएको पहिरोले गर्दा सिन्धुपाल्चोकमा घर पुरिदा मृत्यु हुनेको संख्या ९ पुगेको छ । बाह्रबिसे नगरपालिका–७ मा पहिरोले पुरिएकामध्ये ९ जनाको शव भेटिएको हो । अझै २२ जना बेपत्ता छन् ।

पहिरोमा भक्तिमाया श्रेष्ठ, जुनु विक, सुकलाल विक, सन्देश विक, सर्किनी नेवार, धनलाल नेवार, हिरामाया नेवार, ट्याक्सी शेर्पा र ज्ञानीमाया प्रधानको मृत्यु भएको छ उनीहरु सबै वडा नम्बर ७ का हुन् ।

गएराति आएको पहिरोले बाह्रबिसे नगरपालिका–७ मा पर्ने घुम्थाङको नागपुजे, भिरखर्क र नेवार टोलका घरहरु पुरिएका हुन् । अरु ११ घरमा क्षति पुगेका छ । हराईरहेका २२ जनाको खोजी भइरहेको प्रहरीले जनाएको छ ।

पहिरोबाट जिवितै उद्धार गरिएका ३ जनालाई भने उपचारका लागि काठमाडौं पठाइएको छ । सभामुख अग्नि सापकोटाले पहिरोस्थल पुगेर पीडितलाई सान्तवना दिनुका साथै राहत दिने बताएका छन् ।