एक घर एक पीसीआर अभियान : राजविराजमा थप ८७ जनाको स्वाब संकलन

◊ धीरुभाइ

२८ भदौ,  सप्तरी । सहयोद्धा संस्थाले एक घर एक पीसीआर अभियान अन्तर्गत थप ८७ जनाको नमूना स्वाब संकलन गरेको छ । सो संस्थाले राजविराज नगरपालिकालाई कार्यक्षेत्र निर्धारण गरेर थालिएको अभियानको तेस्रो चरणमा राजविराज नगरपालिका वार्ड नम्बर १२ मा शनिबार साँझ ८७ परिवारका ८७ जनाको नमूना स्वाब संकलन गरिएको कार्यक्रम संयोजक शिव साहले बताए ।

राजविराज नगर क्षेत्रमा कोरोना संक्रमण समुदाय स्तरमै फैलिरहेको कारण थप संक्रमण न्यूनिकरणमा सहयोग गर्न पीसीआर परीक्षणको लागि समुदायमा नमूना स्वाब संकलन अभियान सुरु गरिएको संस्थाका अध्यक्ष रबिन्द्र यादवले बताए । राजविराज नगरपालिकाको सो वडा कार्यालयको सहयोगमा स्वास्थ्य चौकीमा आयोजना गरिएको नमूना स्वाब संकलन अभियानमा आएका सहभागीहरुलाई सामाजिक दूरी, मास्कको प्रयोग तथा साबुन पानीले हातधुने जस्ता स्वासथ्य सुरक्षाका उपायहरू अपनाउन लगाएको उनले बताए ।

संस्थाले एक घर परिवारबाट कम्तिमा एक जनाको कोरोना परीक्षण गर्ने उद्देश्यले सुरु गरिएको अभियान अन्तर्गत पहिलो चरणमा राजविराज नगरपालिका वार्ड नम्बर ८ मा ६८ र दोस्रो चरणमा वार्ड नम्बर २ मा ७२ जनाको नमूना स्वाब संकलन गरिसकेको सहयोद्धाका सहसचिव सत्यम यादवले बताए ।

यससँगै अभियानले हालसम्म २२७ जना परिवारको नमूना स्वाब संकलन गरिएको छ । संकलन गरिएको स्वाब परीक्षणको लागि राजविराज स्थित गजेन्द्र नारायण सिंह अस्पतालको कोभिड–१९ प्रयोगशालामा पठाउने बताइएको छ ।