मन्त्रिमण्डल पुर्नगठनको गृहकार्य शुरु

२८ भदौ, काठमाडौं । सत्तारुढ नेपाल कम्युनिष्ट पार्टीभित्रको रडाको भागबण्डामा मिलाउन नेतृत्व तह राजी भएपछि त्यसको खाका तयार गर्ने काम तीव्र रुपमा अघि बढेको छ ।  दुईजना अध्यक्षको काम, कर्तव्य र अधिकारबारे स्पष्ट आधारका साथ पार्टी महासचिव विष्णु पौडेल नेतृत्वको ६ सदस्यीय कार्यदलले प्रतिवेदन दिएपछि विकसित घटनाक्रमलाई व्यवहारमा उतार्न गृहकार्य हुन थालेको हो ।

कार्यदलको प्रतिवेदनलाई सचिवालयले स्वामित्वमा लिइसकेपछि गरिएको परिमार्जनलाई स्थायी कमिटीले समेत अनुमोदन गरेपछि दुवै अध्यक्षबीचको कार्यविभाजन प्रष्ट भएको भनिएको छ । अब कार्यदलले दिएको सुझाव अनुसार भागबण्डा मिलाउने काम बाँकी छ– एकजना स्थायी कमिटी सदस्यले भने । त्यसको शुरुआत मन्त्रिपरिषद पुर्नगठनबाट हुने छ – स्रोत भन्छ । यसका लागि प्रधानमन्त्री केपी ओली र कार्यकारी अध्यक्ष पुष्पकमल दाहाल प्रचण्ड गृहकार्यमा जुटेका छन् ।

मन्त्रिपरिषद पुर्नगठन मात्र होइन, सम्पूर्ण राजनीतिक नियुक्तिलगायत विषयमा प्याकेजमै कार्यक्रम आउने छ भन्दै उनले पार्टी उपाध्यक्ष बामदेव गौतमलाई राष्ट्रियसभामा लैजाने विषयपनि त्यसैमा समेटिने जानकारी दिए । तर प्रधानमन्त्री ओली चाहिं सकेसम्म बामदेव राष्ट्रियसभामा नजाउन भन्ने पक्षमा रहेको पनि स्रोतको दावी छ । त्यसैले अहिलेसम्म होल्ड गरेर राखेको हो – उनले भने । तर बामदेव आफैंले नजाने नभनेसम्म ओलीले कुनै दवाव दिने छैनन् ।

बामदेवलाई राष्ट्रियसभामा लैजाने भनी ओलीले नै प्रस्ताव गरेको पनि आज १० दिन भइसक्यो, तर निर्णय कार्यान्वयन भएको छैन, त्यसको कारण नै त्यही हो – स्रोतको भनाई छ । यसबीचमा ओलीले बामदेवलाई बालुवाटार बोलाएर दुईपटक भेटिसके । दुवै भेटमा बामदेव राष्ट्रियसभामा जान अनिच्छुक देखिएनन् । बरु दुुवैपटक उनले अर्थमन्त्रालयसमेत दिन आग्रह गरेका थिए । ओलीले भने यसबारे केही बोलेनन् । तर बामदेवले पटक पटक मन्त्री बन्ने इच्छा जाहेर गरेकाले उनलाई बाइपास गर्न अफ्ठेरो रहेको निकटहरुसँग भन्ने गरेका छन् ।

अब दशैंको मुखमा मात्रै मन्त्रिपरिषदमा पुर्नगठन हुने सम्भावना रहेको स्रोतले बतायो । केही पुरानालाई हटाएर नयाँ अनुहारलाई ठाउँ दिने मापदण्डसमेत दुवै अध्यक्षले बनाउन थालेको उनको दावी छ । एक दर्जन मन्त्रीहरु फेरबदलमा पर्नसक्ने अवस्था छ भन्दै स्रोतले त्यसको मापदण्ड दुईचार दिन भित्रै बन्ने जानकारी दिए । अहिले ओलीको सल्लाहकार समूहमा यसबारे गम्भिर छलफल भइरहेको छ , कसलाई मन्त्री र संवैधानिक आयोगमा लैजाने र कसलाई राजदूत बनाउने भन्ने तहसम्मका छलफल भइरहेका छन् – उनले भने ।

अख्तियार दुरुपयोग अनुसन्धान आयोगलगायत धेरै संवैधानिक निकायमा खाली भएकाले पनि मापदण्ड बनाएर लैजाने तयारी भएको हो – उनले भने । अबको पुनर्गठनमा पर्ने मन्त्रीहरुलाई बाँकी अवधि पूरै मौका दिने ओलीको योजना रहेको छ । यो प्रतिनिधिसभाको आधा कार्यकाल अर्थात अढाई वर्ष पूरा भइसकेको छ । बाँकी अवधिका लागि नयाँ मन्त्री ल्याउँदा विगतका गल्ती नदोहो¥याउने उनको सोच रहेको स्रोत बताउँछ ।

त्यसैले बामदेव लगायत हेवीवेटलाई आफ्नो मन्त्रिपरिषदमा ल्याउने ओलीको दाउ रहेको छ । हेभीवेटलाई मन्त्रिमण्डलमा ल्याउन सक्दा विगतको जस्तो राजनीतिक अवरोध नआउने उनको ठम्याई रहेको छ । त्यसैले बामदेवका साथै नारायणकाजी श्रेष्ठलाई समेत मन्त्रिमण्डलमा ल्याउने पक्षमा ओली रहेका छन् । पोर्टफोलियोमा विवाद भएन भने यी दुवैजना पुर्नगठनमा पर्नेछन् – स्रोतको भनाई छ ।

त्यसैगरी रामबहादुर थापा र ईश्वर पोखरेललाई समेत आफ्नो पक्षमा राख्ने बाध्यता ओलीका सामुन्ने रहेको छ । सचिवालयमा पोखरेल र थापाले ओलीलाई साथ दिंदै आएका छन् । माधव नेपाल पक्षका दुईजना हेभीवेटलाई मन्त्री बनाउने उनको सोच रहेको छ । भीम रावल र अर्का एकजनालाई समेट्ने पक्षमा उनी छन् ।

तर नेपाल भने सुरेन्द्र पाण्डेलाई अर्थमन्त्रीका रुपमा पठाउने योजनामा रहेका छन् । ओली भने पाण्डेको बदला अरु नै कसैलाई ल्याउने दाउमा रहेका छन् । पाण्डेसँग उनको व्यक्तिगत मतभेद रहेको बुझिएको छ ।