एसपी राठौरको कमाण्डमा ठूलो परिणाममा गाँजा बरामद

♦ जगन्नाथ साह साेनी

२८ भदौ, सर्लाही । नेपाल प्रहरीले सर्लाहीबाट ३ सय ९ किलो गाँजा बरामद गरेकाे छ । ना ४ ख ७७४८ नम्बरको ठूलो ट्रकमा लोड गरिएको ३ सय ९ किलो गाँजा सर्लाही प्रहरीले बरामद गरेको हो ।

सर्लाहीका प्रहरी प्रमुख प्रहरी उपरीक्षक सन्तोषसिंह राठौरको कमाण्डमा खटिएको टोलीले पर्सा गाउँपालिका वडा नम्बर ५ डोमोवा टोलबाट शनिबार राति ३ सय ९ किलो गाँजा बरामद गरेको हो । सर्लाहीको ग्रामीण इलाका हुँदै अवैध रुपमा भारततर्फ लगिँदै गरेको गाँजासहितको ट्रक प्रहरीले नियन्त्रणमा लिएको हो ।

सोबाटो हुँदै भारततर्फ गाँजा निर्यात हुने गरेको विशेष सूचनाको आधारमा सर्लाहीका एसपी राठौरको नेतृत्वमा खटिएको प्रहरी टोलीले गएराति पर्सा गाउँपालिका वडा नम्बर ५ स्थित डोमोवा टोलमा रहेको चिरानमिलस्थित सडकबाट उक्त परिणामको गाँजा बरामद गरेको हो । रातिको समयमा सो ट्रकलाई चेकजाँच गर्ने क्रममा चालक फरार भएको र ट्रकको ढाला चेकजाँच गर्दा ११ वटा पोकामा प्याक गरिएको अवस्थामा सो परिमाणको लागु औषध गाँजा फेला परेको प्रहरीले जनाएको छ ।

गाँजालाई मेशिनले पेलेर धुलो बनाएपछि १–१ किलोको प्याकेट बनाएर भारतमा बेच्न लैजाने गरेको प्रहरीको प्रारम्भिक अनुसन्धानबाट खुलेको छ । जिल्ला प्रहरी कार्यालय सर्लाहीका प्रहरी निरीक्षक राजुप्रसाद कुर्मीले ट्रक चालकलगायत लागु औषध कारोबारमा संलग्न अन्य व्यक्तिहरुको पहिचान तथा खोजतलास भइरहेको जानकारी दिए ।

ट्रकबाट बरामद गरिएको गाँजामध्ये ११ वटा पोकामध्ये ९ वटामा ३१ किलोका दरले र २ वटामा १५ किलोका दरले गाँजा राखिएको थियो । प्रहरीलाई देखेपछि ट्रक बन्द नगरी चालक भने भागेका थिए । फरार रहेका ट्रक चालकको  पनि खोजी भइरहेको प्रहरीले जनाएको छ ।