रोनाल्डोलाई पछि पार्दै मेस्सी बने सर्वाधिक कमाउने फुटबलर, नेयमार तेस्रो

२९ भदौ, एजेन्सी । प्रतिष्पर्धी क्रिष्टियानो रोनाल्डोलाई पछि पार्दै बार्सिलोनाका कप्तान लियोनल मेस्सी सर्वाधिक कमाई गर्ने नम्बर एक फूटबलर बनेका छन् । सन् २०२० मा मेस्सीले सर्वाधिक १ सय २६ मिलियन कमाई गरेका छन् ।

दोस्रो स्थानमा रहेका रोनाल्डोले १ सय १७ मिलियन कमाई गरेका छन् । अर्बपतिहरुको कमाई सार्वजनिक गर्ने फोब्र्स म्यागजिनका अनुसार मेस्सी र रोनाल्डोपछि नेयमार सबैभन्दा धेरै कमाई गर्ने तेस्रो फुटबलर बनेका छन् ।

मेस्सी फेरि एकपटक बार्सिलोनाबाटै धेरै कमाई गर्ने फुटबलर बन्दा रोनाल्डो युभेन्ट्समा छन् । गएको बर्ष रोनाल्डो धेरै कमाई गर्ने फुटबलरको शीर्ष स्थानमा थिए । पीएसजीका नेयमारले तेस्रो स्थान कब्जा गर्दा उनकै टिममेट केलियन एमबाप्पे पहिलोपटक चौथो सर्वाधिक कमाई गर्ने फूटबलर बनेका छन् । एमबाप्पेले यस बर्ष ४२ मिलियन अमेरिकी डलर कमाएका छन् ।

प्रिमियर लिग च्याम्पियन लिभरपुलका मोहम्मद सलाह ३७ अमेरिकी डलर सहित पाँचौं स्थानमा छन् । ३४ मिलियनसहित म्यानचेस्टर युनाइटेडका पाउल पोग्बा छैटौं, ३३ मिलियन कमाई गरेका बार्सिलोनाका एन्टोनियो ग्रिजम्यान सातौं र २९ मिलियनसहित रियल मड्रिडका ग्यारेथ बेल आठौं स्थानमा छन् ।

त्यस्तै बायर्न म्युनिखका रोबर्ट लेवान्डोस्की २८ मिलियनसहित नवौं र म्यानचेस्टर युनाइटेडका डेभिड जिया २७ मिलियनसहित दशौँ स्थानमा रहेका छन् । संसारमा स्ट्राइकरहरु नै धेरै कमाई गर्ने भएपनि डि जिया पहिलोपटक धेरै कमाई गर्ने पहिलो गोलकिपर हुन् ।