अब लक्षण नदेखिएकाको कोरोना परीक्षण नगर्ने स्वास्थ्य मन्त्रालयको निर्णय

३० भदौ, काठमाडौं । कोरोना भाइरसको संक्रमण सामान्य हुन थालेको भन्दै सरकारले अब लक्षण नदेखिएकाको पीसीआर परीक्षण नगर्ने निर्णय गरेको छ । स्वास्थ्य तथा जनसंख्या मन्त्री भानुभक्त ढकालको अध्यक्षतामा बसेको ‘इन्सिडेन्ट कमान्ड सेन्टर’को बैठकले लक्षण नदेखिएकाहरुको पीसीआर परीक्षण नगर्ने निर्णय गरेको हो ।

बैठकले फ्रन्टलाइनमा खटिएका स्वास्थ्यकर्मीको पनि लक्षण नदेखिएसम्म पीसीआर परीक्षण नगर्ने निर्णय गरेको छ। स्वास्थ्यकर्मीकै परीक्षण नगर्ने भएपछि सर्वसाधारणको परीक्षण गर्ने सम्भावना झन कम भएको छ ।

‘कोभिड १९को लक्षण वा चिन्ह देखिएका व्यक्तिहरुमा मात्रै आरटी पिसीआर परिक्षण गर्ने, कोभिड १९ को परीक्षण सम्बन्धमा गरिएको निर्णय पत्रमा उल्लेख छ, अग्रपंक्तिमा खटिने स्वास्थ्यकर्मीहरु खासगरी उपचारमा खटिने चिकित्सक, नर्स, प्रयोगशाला तथा सरसफाई कर्मचारीहरुमा कुनै लक्षण वा चिन्ह देखिएमा वा व्यक्तिगत सुरक्षा सामग्रीहरु उपयुक्त ढंगले नलागेको शंका भएमा मात्रै आरटी पिसीआर परीक्षण गर्न’ मन्त्रलयले निकालेको सुचनामा उल्लेख छ ।

मन्त्रालयले क्वारेन्टाइनमा बसेका व्यक्तिहरुमा पनि लक्षण देखिएकाहरुको मात्रै पिसीआर परीक्षण गर्ने लक्षण नदेखिएकाको नगर्ने निर्णय गरेको छ। यस निर्णयले सरकार महामारी नियन्त्रण गर्नुको साटो जिम्मेवारीबाटै पन्छिने गरेको पुष्टि भएको छ ।