अन्तर्राष्ट्रिय सीमा नाका असोज ३० गतेसम्म बन्द

३० भदौ, काठमाडाैं । कोरोनाका कारण बन्द रहेका अन्तर्राष्ट्रिय सीमा नाका असोज ३० गतेसम्म बन्द नै रहने भएका छन् । कोरोना भाइरसको सङ्क्रमण कम नभएपछि भदौ ३१ गतेसम्म रोक लगाइएको सीमा नाका असोज ३० गतेसम्मै बन्द गरिएको सरकारका प्रवक्ता तथा परराष्ट्रमन्त्री प्रदीप ज्ञवालीले बताए ।

सोमबार बसेको मन्त्रिपरिषद् बैठकले अन्तर्राष्ट्रिय सीमा नाका असोज ३० गतेसम्म बन्दै राख्ने निर्णय गरेको हो । साथै सरकारले थप दुई नाका खोल्ने निर्णय पनि गरेको छ । यसअघि १० वटा नाका मात्रै खुला भएकोमा अब १२ वटा नाका खुल्ने भएका हुन् ।

इलामको पशुपतिनगर र दार्चुला गरी दुई नाका खुलाएर थपेर १२ वटा नाका खुला गरिएको हो । यस्तै चीनतर्फको रसुवागढी नाका पनि खुला गर्ने निर्णय गरिएको छ ।