बल्खुबाट बढी मूल्यमा प्याज विक्री गर्ने व्यवसायी पक्राउ

३१ भदौ, काठमाडौं । बल्खु बजारबाट बढी मूल्यमा प्याज विक्री गरेको अभियोगमा एक व्यवसायी पक्राउ परेका छन् । काठमाडौं महानगरपालिकाको अनुगमन टोलीले सुनिल केसीलाई बढी मूल्यमा प्याज विक्री गरेको अवस्थामा फेला पारेर नियन्त्रणमा लिएको हो ।

टोलीले कानुनी कारबाहीका लागि केसीलाई महानगरीय प्रहरी वृत्त, कालिमाटीको जिम्मा लगाएको छ । प्रहरीले केसीको पसलबाट दुई सय ४० बोरा प्याज पनि बरामद गरेको छ । अनुगमनका क्रममा वाणिज्य विभागले अन्य ७ वटा पसललाई समेत हाजिर भएर जरिवाना तिर्न भन्दै पूर्जी काटेको छ ।

उनीहरुले एक सय ३० रुपैयाँ प्रतिकिलोमा प्यास विक्री गरेको पाइएको प्रहरीले जनाएको छ । सोमबारसम्म प्याजको मूल्य प्रति किलो ७६ रुपैयाँ थियो । भारतले प्याज निर्यातमा रोक लगाएसँगै नेपालमा बढी मूल्यमा किनबेच हुन थालेको छ । मूल्यमा अधिक बढोत्तरी भइरहेको उल्लेख गर्दै भारतको केन्द्र सरकारले प्याज निर्यातमा पूर्ण प्रतिबन्ध लगाएको छ ।