कांग्रेस महामन्त्री डा. कोइराला ओम अस्पतालमा भर्ना

३१ भदौ, काठमाडौं । नेपाली कांग्रेसका महामन्त्री डा. शशांक कोइराला स्वास्थ्यमा समस्या देखिएपछि अस्पताल भर्ना भएका छन् । कोरोना भाइरसबाट संक्रमित कोइरालालाई गए रातीदेखि ज्वरो आएपछि चावहिलस्थित ओम अस्पताल भर्ना गरिएको छ ।

उनकाे अहिले आइसीयूमा राखेर उपचार थालिएको छ । कोइरालालाई गएराति नै अस्पताल भर्ना गरिएको हो । कोइरालालाई कोभिड विशेष निगरानी कक्षामा राखेर उपचार थालिएको अस्पतालले जनाएको छ । चिकित्सकहरुले उनमा निमोनिया भएको प्रारम्भिक अनुमान गरेका छन्  ।

नेता शशांकको उपचारमा ओम अस्पतालका मेडिकल डाइरेक्टरसमेत रहेका सिनियर कन्सल्ट्यान्ट फिजिसियन डा. विश्वनाथ कोइराला नेतृत्वको टोली खटिएको छ । टोलीमा सिनियर कन्सल्ट्यान्ट पल्मोनोलोजिष्ट डा. सुबोध सागर ढकाल, कन्सल्ट्यान्ट इन्टेन्सिभिष्ट डा. प्रमेश सुन्दर श्रेष्ठ लगायत छन् । पाँच वर्षअघि एस्पिरेशन न्युमोनियाका कारण अचानक अचेत हुँदा पनि डा. कोइरालाको उपचार ओम अस्पतालको सघन उपचार कक्षमा गरिएको थियो ।

गएको भदौ २३ गते उनमा कोभिड १९ को संक्रमण पुष्टि भएको थियो। त्यसयता उनी होम आइसोलेसनमा रहँदै आएका थिए। नेपाली कांग्रेसको महाधिवेशनमा कोइरालाले सभापति पदमा दाबी गर्दै आएका छन् ।