कांग्रेस महामन्त्री कोइराला आईसीयुमा, विशेषज्ञ डाक्टरले उपचार गर्दै !

३१ भदौ, काठमाडौं । नेपाली काँग्रेसका महामन्त्री डा. शशाङ्क कोइरालाको स्वास्थ्य अवस्था जटिल बनेको छ । कोरोना संक्रमित महामन्त्री कोइरालालाई निमोनिया भएपछि अस्प्ताल भर्ना गरिएको हो ।

चावहिलस्थित ओम अस्पतालमा मंगलबार नै भर्ना गरिएका उनलाई आईसीयुमा राखेर उपचार थालिएको छ । कोरोना पुष्टि भएपछि घरमै होमआइसोलेसनमा बसेका उनलाई मंगलबारदेखि भने ज्वरो आएको थियो ।

अस्पतालका प्रबन्ध सञ्चालक बाबुकाजी कार्कीका अनुसार महामन्त्री डा कोइरालाको अहिले सघन उपचार कक्ष अर्थात आईसीयुमा उपचार भइरहेको हो । “अस्पताल आएदेखि नै हामीले आइसियुमा राखेर उपचार गरिरहेका छौँ”, उनले भने, “अहिले उहाँको ज्वरो घटेर स्वास्थ्यमा सुधार भइरहेको छ ।” उनका अनुसार महामन्त्री डा. कोइरालालाई निमोनिया भएको छ ।

महामन्त्री कोइरालाको उपचारमा अस्पतालमा निर्देशक डा विश्वनाथ कोइरालाको नेतृत्वमा डा सुवोधसागर ढकाल र डा प्रमेशसुन्दर श्रेष्ठलगायतको टिम रहेको छ । उनको स्वास्थ्य अवस्था स्थिर रहेको अस्पतालका प्रबन्ध निर्देशक कार्कीले जानकारी दिए । केही दिनअघि महामन्त्री डा कोइरालालाई कोरोना सङ्क्रमण देखिएको थियो ।