संवैधानिक आयोगमा भागबण्डा : ओली, देउवा र प्रचण्डबीच छलफल हुँदै

१ असोज, काठमाडौं । संवैधानिक आयोगमा रिक्त रहेका ४८ पदमा नेताहरुले भागबण्डा गर्दैछन् । संवैधानिक आयोगहरुमा आदिवासी जनजाति आयोग, महिला आयोग र दलित आयोगमा पाँच पाँच जना पदाधिकारीहरु चयन गर्न बाँकी छ । भाषा आयोगमा ६ पदाधिकारी खाली छन् ।

त्यसैगरी मुस्लिम आयोग, थारु आयोग, मधेसी आयोग, समावेसी आयोग र वित्त आयोगमा चार चार जना जना पदाधिकारीहरु रिक्त छन् । पछिल्लो समय अख्तियार दुरुपयोग अनुसन्धान आयोगको प्रमुखसहित तीन आयुक्त पद पनि रिक्त छ ।

लामो समयदेखि सत्तारुढ र प्रतिपक्षी दलका नेताबीच भागबण्डा मिल्न नसक्दा संवैधानिक आयोगमा पदाधिकारी रिक्त भएका हुन् । तर पछिल्लो समय संवैधानिक आयोगमा पदाधिकारी नियुक्त गर्न प्रधानमन्त्री ओली र कांग्रेस सभापति शेरबहादुर देउवालो विशेष चाँसो दिएका छन् । सोही अनुसार बिहीबार बालुवाटारमा रिक्त पदको भागबण्डाका विषयमा छलफल हुदैछ ।

छलफलमा प्रधानमन्त्री तथा नेकपाका अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र नेकपाका अर्का अध्यक्ष प्रचण्डबीच छलफल हुदैछ ।