मेरो चिन्ता गर्नुपर्दैन, दुई तीन दिनमै म डिस्चार्ज हुन्छु : महामन्त्री कोइराला

१ असोज, काठमाडौं । नेपाली कांग्रेसका महामन्त्री डा. शशाङ्क कोइरालाले आफू दुई तीन दिनमा नै अस्पतालबाट डिस्चार्ज हुने बताएका छन । आज भिडियो सन्देश जारी गर्दै उनले अहिले आफू ओम अस्पतालको सघन उपचार कक्ष ‘आइसियु’मा उपचार गरिरहेको र चाँडै नै निको भएर घर फर्किने बताए ।

“ मेरो चिन्ता गर्नुपर्दैन, दुई तीन दिन अस्पताल बसेर म डिस्चार्ज हुन्छु”, उनले भिडियो सन्देशमा भनेका छन। कोरोना भाइरस ‘कोेभिड १९’ को सङ्क्रमण देखिएपछि उनी मंगलबार अस्पताल भर्ना भएका थिए ।

होम आइसोलेसनमा रहनु भएका कोइरालालाई ज्वरो आएपछि अस्पताल भर्ना गरेर उपचार भइरहेको अस्पतालका प्रवन्ध सञ्चालक बाबुकाजी कार्कीले जानकारी दिए । महामन्त्री डा। कोइरालाको स्वास्थ्य अवस्थाबारे भ्रामक कुरा आएपछि अस्पतालले उनको भिडियो सन्देश जारी गरेको हो ।