आजैदेखि सबै सिटमा यात्रु राखेर गाडी चलाउने यातायात व्यवसायीको चेतावनी

४ असोज, काठमाडौं । सरकारले सडक यात्राका यात्रु र व्यवसायीलाई विभेद गरेको भन्दै यातायात व्यवसायी आक्रोशित भएका छन् । हवाई यात्रामा सबै सिटमा यात्रु चढ्न दिने तर सडक यात्राका व्यवसायीलाई मार पार्ने गरी आधा मात्रै यात्रु चढाउन दिने सरकारको काम विभेदकारी भएको व्यवसायीको गुनासो छ ।

जहाजमा पूरा सिटमा मान्छे राख्न दिएर सरकारले सार्वजिनक बसमा विभेदकारी नीति ल्याएको व्यवसायीको भनाई छ । नेपाल यातायात व्यवसायी राष्ट्रिय महासंघका महासचिव सरोज सिटौलालले गाडीमा आधा मात्र यात्रु राख्न पाउने, तर विमानमा सबै यात्रु राख्न दिने नीतिले सरकार विभेदकारी देखिएको बताए ।

पहुँचकै आधारमा विमानले सबै सिटमा यात्रु राख्न पाएको पनि उनको भनाई छ । गुड्ने र उड्ने नियम यति धेरै फरक हुनु जनता र व्यवसायीका लागि समेत अपाच्य भएको उनको भनाई छ । सरकारले जारी गरेको मापदण्डअनुसार असोज १ गतेदेखि देशभर लामो तथा छोटो दूरीका गाडी चलिरहेका छन् ।

५० प्रतिशत बढी लिएर गाडी चलाएपनि व्यवसायी मार खेपिरहेको बताएका छन् । तर भोलिदेखि शुरु हुने आन्तरिक उडानमा भने सबै सिटमा यात्रु चढ्न पाउनेछन् । यसले विभेद भएको यातायात व्यवसायीको भनाई छ ।