कोशी अस्पतालका डाक्टरमा कोरोना, उपचारका लागि भारत लगियो !

५ असोज, विराटनगर । कोशी अस्पताल विराटनगरका एक चिकित्सकलाई कोरोना भाइरसको संक्रमण पुष्टि भएको छ । कोशी अस्पताल विराटनगरको बाल रोग उपचार विभागमा कार्यरत चिकित्सक डाक्टर विनोद बिराजीलाई कोरोना संक्रमण पुष्टि भएको हो ।

शनिबार साँझ सडकमा हिँड्दै गर्दा कोशी अस्पताल नजिकै उनी बेहोस भएका थिए । तत्काल उपचारका लागि कोशी अस्पतालको इमरजेन्सी हुँदै आईसीयूमा भर्ना गरिएको थियो । आइसियूमा राखेर उपचार गर्ने क्रममा आइतबार उनलाई कोरोना पोजेटिभ देखिएको थियो ।

मस्तिष्कमा पनि समस्या देखिएपछि आफन्तले उनलाई उपचारका लागि भारततर्फ लागेका छन् । कोशी अस्पताल विराटनगरका मेडिकल सुपरीटेण्डेन्ट डाक्टर चुमनलाल दासका अनुसार उनलाई आइतबार नै भारततर्फ लगिएको हो ।

ती चिकित्सकको उपचारमा खटिएका अस्पतालका १६ जना स्वास्थ्यकर्मी क्वारेन्टिनमा बसेका छन् ।