७ दिनमै गल्यो डा.केसीको शरीर, जुम्लाबाट काठमाडौं ल्याउने तयारी

५ असोज, काठमाडौं । जुम्लामा अनसनरत डा. गोविन्द केसीको स्वास्थ्य अवस्था जटिल बनेको छ । कर्णाली स्वास्थ्य विज्ञान प्रतिष्ठान जुम्लामा राखिएपनि डा.केसीले उपचार लिन मानेका छैनन् । अस्ति राती उनलाई स्वास्थ्यमा समस्या देखिएपछि जबर्जस्ती कर्णाली स्वास्थ्य विज्ञान प्रतिष्ठान भर्ना गरिएको थियो ।

तर उनले उपचार लिन अझै मानेका छैनन् । गएरातीदेखि उनको रक्तचाप, श्वासप्रश्वासमा समस्या देखिएपछि उपचारका लागि नेपालगञ्ज हुँदै काठमाडौं ल्याउन लागिएको हो । काठमाडौं आउन डा. केसीले इच्छा देखाएका जुम्लाका डाक्टरहरुले बताएका छन् ।

सोमबार उनलाई समिट एयरको जहाजमार्फत् नेपालगञ्ज ल्याउने र भोलि काठमाडौं ल्याउने तयारी छ । डा.केसीले कर्णालीमा शिक्षा र स्वास्थ्यको पठनपाठन निःशुल्क हुनुपर्ने, कर्णाली स्वास्थ्य विज्ञान प्रतिष्ठानमा तत्काल पूर्वाधार र जनशक्ति पुर्‍याएर एमबिबिएसलगायतका कार्यक्रमहरु सञ्चालन गर्नुपर्ने, गेटा मेडिकल कलेज र राप्ती स्वास्थ्य विज्ञान प्रतिष्ठानमा पूर्वाधार र जनशक्ति पुर्‍याएर पठनपाठन सुरू गर्नुपर्ने माग राखेका छन् ।

यस्तै प्रदेश नम्बर दुई र गण्डकी प्रदेश तथा डोटी वा डडेल्धुरा, उदयपुर र इलाम वा पाँचथरमा सरकारी मेडिकल कलेज खोल्ने प्रक्रिया अघि बढाउन डा.केसीको माग छ । तर अहिलेसम्म भने सरकारले उनको माग तथा अनसनका विषयमा सोधीखोजी गरेको छैन् ।