ओली र प्रचण्डबीच दुई घण्टा छलफल, अझै मन्त्रीको टुंगो लागेन !

५ असोज, काठमाडौं । सत्तारुढ नेकपाका अध्यक्ष तथा प्रधानमन्त्री केपी शर्मा ओली र कार्यकारी अध्यक्ष प्रचण्डबीच बालुवाटारमा दुई घण्टा छलफल भएको छ । मन्त्रीमण्डल हेरफेर गर्ने विषयमा दुई अध्यक्षबीच दुई घण्टा छलफल भएपछि मन्त्री बन्नेको नाम भने टुंिगएको छैन् ।

मन्त्री बन्ने तथा अहिले भएका मन्त्रीलाई हटाउने विषयको टुंगो लगाउन सचिवालय बैठक स्थगित गरेर ओली र प्रचण्डबीच बालुवाटारमा छलफल भएको हो । खासगरी हटाउने र नयाँ मन्त्री बन्नेको नाम टुंगो लगाउन दुई अध्यक्षलाई सकस देखिएको छ ।

अहिले भएका खास निकट मन्त्रीलाई हटाउन दुवै अध्यक्ष तयार छैनन् । नयाँ बन्ने मन्त्रीको नाम पनि धेरै जनाको भएपछि त्यसबाट सिमित नाम छान्न दुवै नेतालाई दबाब परेको हो । प्रचण्डलाई वरिष्ठ नेता माधव कुमार नेपाल पक्षका नेताहरुलाई मन्त्री बनाउनुपर्ने भएपछि मन्त्री बन्नेको नाम पनि समेटेर ओलीलाई कन्भिन्स गर्नुपर्ने जिम्मेवारी छ ।

सोही कारण आज महत्वपूर्ण ठानिएको दुई अध्यक्षबीचको छलफल लम्बिएपनि निष्कर्षमा पुग्न सकेन् । आज भएको छलफलअनुसार भोलिको सचिवालय बैठकमा एजेन्डा र नाम प्रस्तुत गर्ने तयारी छ । तर अझै पर्याप्त छलफल र एकिन नाममा सहमति नजुटेकाले भोलिको बैठकबाट पनि मन्त्रिमण्डल हेरफेर गर्ने निर्णय अझै पछाडी धकेलिने संकेत देखिएको छ ।

यसअघि हिजो बसेको नेकपा सचिवालय बैठकले मन्त्रिपरिषद पुनर्गठन लगायतका विषयमा छलफल गरेको थियो । तर सहमति जुट्न सकेको थिएन । मन्त्रिपरिषद पुनर्गठन गर्ने निर्णय गरिएपनि निष्कर्ष नआएपछि भोलि बालुवाटारमा बोलाइएको नेकपाको सचिवालय बैठक प्रभावित हुने सम्भावना छ । यसअघि हिजो भने पेरिसडाँडामा बैठक बसेको थियो ।