डा.केसीको पक्षमा माइतीघरमा प्रदर्शन

५ असोज, काठमाडौं । अनसनरत डा. गोविन्द केसीको माग सम्बोधन गर्न दबाब दिदै काठमाडौंको माइतीघरमा प्रदर्शन भएको छ । सोलिडारिटी फर डाक्टर गोविन्द केसी अलाइन्स’ले माइतिघर मण्डलामा सोमबार बेलूकी प्रदर्शन गरेको हो ।

डाक्टर गोविन्द केसीको जीवन रक्षा गर्नुपर्ने, सबै मागहरु पूरा गर्नु पर्ने लगायतका नारा लेखिएका प्लेकार्ड बोकेर उनीहरुले प्रदर्शन गरेका थिए । डाक्टर गोविन्द केसी गत भदौ २९ गतेदेखि जुम्लाको रानीचौरस्थित बाबिरामष्ट मन्दिरमा १९ औं अनसन बसेपनि अनसनलाई निरन्तरता दिदै स्वास्थ्यमा समस्या भएपछि जुम्लाबाट विमान चढेर नेपालगञ्ज पुगेका छन् ।

उनी भोलि मात्रै काठमाडौं आइपुग्ने छन् । तर केसीको स्वास्थ्य अवस्था जटिल बन्दै गएपछि उनका माग सम्बोधन गर्न दबाब बढ्दै गएको छ । सोही अनुसार भोलि पनि माइतीघरमा प्रदर्शन गर्ने केसी पक्षका समर्थकको तयारी छ ।