नबिल बैंकले बिना धितो एक लाख रुपैयाँ खातामा पठाउने !

६ असोज, काठमाडौं । नबिल बैंक लिमिटेडले बिना धितो एक लाख रुपैयाँ खातामा पठाउन सक्ने व्यवस्था गरेको छ । मोवाईल फोनबाट ऋण माग गर्न सक्ने प्रणालीको विकास गरी बैंकले ऋण लिन सक्ने योजना सार्वजनिक गरेको हाे । एफवन सफ्ट इन्टरनेशनलसँगको सहकार्यमा बैंकले यो सुविधा सुरु गरेको छ ।

यो सुविधा अन्तर्गत नबिल बैंकमा खाता भएका ग्राहकहरुले आवश्यकता अनुसार १ लाख रुपैयाँसम्म ऋण मोबाइलबाटै लिन पाउनेछन् । यो सुविधा लिन नबिलको स्मार्ट बैंक प्रयोगकर्ता हुनुपर्नेछ ।

नबिल स्मार्ट बैंकिङ अन्तर्गत निवेदन दिएको केही मिनेटमै ग्राहकको ‘भर्चुअल क्रेडिट कार्ड’ मार्फत् खातामा ऋण उपलब्ध हुनेछ । बिनाधितो, बिना कागजी प्रक्रिया तुरुन्त ऋण प्राप्त गर्न सकिने भएकाले यो योजना लोकप्रिय हुने अपेक्षा बैंकले लिएकाे छ ।

यस प्रकारको ऋण छोटो अवधिका लागि मात्र उपलब्ध हुने बैंकले जानकारी दिएको छ । ग्राहकले कुनै पनि कागजी प्रक्रिया बिना नै नबिल बैंकको स्मार्ट बैंक एपको प्रयोग गरी ऋणका लागि निवेदन दिन सक्नेछन् । बैंकले सम्पूर्ण प्रक्रिया पूरा गरी तुरुन्त ऋण प्रवाह गर्ने जनाएको छ ।