टेकुमा पीसीआर गर्नेको अत्यधिक भीड, नियन्त्रण गर्न अस्पताललाई हम्मेहम्मे

६ असोज, काठमाडौं । टेकुस्थित शुक्रराज ट्रपिकल तथा सरुवा रोग अस्पतालमा कोभिड–१९ परीक्षणका लागि आउनेको संख्या अत्यधिक बढ्न थालेको छ । लामो दुरीका सार्वजनिक यातायात खुलेसँगै अस्पतालमा पीसीआर परीक्षण गर्नेको अत्यधिक भीड बढेको हो ।

सरकारले कोभिड–१९ को रोकथाम र नियन्त्रणका लागि सामाजिक दूरी कायम गर्न भनेपनि अस्पतालमै भीड नियन्त्रण गर्न हम्मेहम्मे परेको छ ।  भीड व्यवस्थापन गर्न अस्पताललाई असाध्यै गाह्रो भइरेहको छ । तेसो त मन्त्रालयबाटै स्पष्ट निर्देशन नहुँदा सो अस्पताललाई व्यवस्थापन गर्न टेकुमा असाध्यै गाह्रो भइरेहको हो ।

टेकुले स्वाब संकलन गरेको ७२ घण्टामा पीसीआर परीक्षणको रिपोर्ट दिने गरेको छ । टेकुमा स्वाब दिन मात्र होइन, पीसीआर परीक्षणको रिपोर्ट लिन पुग्नेहरुको लाइन पनि चक्मा दिने खालको छ । अस्पतालले सामाजिक दूरी कायम गर्न आग्रह गर्दै आएको छ । भीड धेरै हुँदा दूरी कायम गर्न गाह्रो भएको छ ।

टेकुमा सोमबार मात्र काठमाडौं बाहिरबाट आएका तीन हजारभन्दा बढी मानिसहरुले पीसीआर परीक्षण गराएका छन । तर, उक्त लाइनमा पहाडी भेगका मानिसको अनुहार भन्दा पनि एकाध बाहेक सबै मधेसबाट आएकाहरु छन ।

बन्दाबन्दीमा उपत्यका बाहिर गएकाले अहिले घरबेटीलाई देखाउन परीक्षण गर्नेको सङ्ख्या सबैभन्दा बढी छ । कोभिड–१९ को जोखिम कम गर्न अस्पतालको परिसरमा भीडभाड कम गर्न प्रशासनले भनेको छ तर अस्पतालमा भने भीडभाड त्यस्तै छ ।

टोकन सिस्टमअनुसार दैनिक पाँच सयको पीसीआर परीक्षण गरिरहेको अस्पतालका प्रवक्ता डा. अनुप बास्तोलले बताएका छन । पछिल्लो समय परीक्षण गरेका मध्य ३० देखि ५० प्रतिशत दैनिक पोजेटिभ रिपोर्ट आइरहेको छ ।