हुम्लाको लिमीमा चीनले नेपाली भूमि अतिक्रमण नगरेको सरकारको स्पष्टोक्ति

७ असोज, काठमाडौं‌ । पछिल्लो समय हुम्लाको लिमी उपत्यकामा चीनले सीमा अतिक्रमण गरेको समाचार सत्य नभएको सरकारले स्पष्ट पारेको छ । चीनले नेपाली भूमि अतिक्रमण गरेको भन्दै सञ्चारमाध्यममा आएका समाचारमा सत्यता नभएको सरकारले जनाएको हो ।

यसअघि २०७३ सालमा पनि यस्ता किसीमका समाचार आएको भन्दै सरकारले लिमी उपत्यकामा चिनिया सेना बसेको क्षेत्र नेपालको नभएको जनाएको हो । मन्त्रिपरिषद बैठकले नै हुम्लामा चीनले नेपाली भूमि अतिक्रमण नगरेको स्पष्ट पारेको हो ।

चीनले नेपाली भूमिमा भवनहरु बनाएको र लिमी उपत्यका हाम्रो हो भन्दै माइकिङ गरेर नेपाली टोलीलाई भनेको खबर सञ्चारमाध्यममा आएको थियो । सरकारका प्रवक्ता तथा परराष्ट्रमन्त्री प्रदीप ज्ञवालीले यस विषयमा २०७३ सालमै गृह, परराष्ट्र मन्त्रालय, नापी विभागका अधिकारीको नेतृत्वमा स्थलगत अध्ययन गरेर सत्यता बाहिर आइसकेको जानकारी दिए ।

त्यतिबेला चीनले आफ्नै भूमिमा घर र भवन बनाएको प्रतिवेदन टोलीले दिएको थियो । अहिले पनि चीनले आफ्नै भूमिमा घर र भवन बनाएकाले त्यसबाट नेपाल आत्तिनुपर्ने कारण नरहेको मन्त्री ज्ञवालीको भनाई छ ।

चीनले नेपाली भूमिमा भवन र घर बनाउँदै गरेको समाचार सञ्चारमाध्यममा आएपछि केही दिनअघि हुम्लाका सीडिओ, सुरक्षाकर्मी लगायतको टोली लिमीमै पुगेर सो ठाउँको निरीक्षण गरेको थियो ।