नेयमारका साथी डी मारियालाई प्रतिबन्ध

८ असोज, एजेन्सी । पेरिस सेन्ट जर्मेन पीएसजीका मिडफिल्डर एन्जल डी मारियालाई ४ खेलको प्रतिबन्ध लागेको छ । सेप्टेम्बर १३ मा भएको लिग वान अन्तर्गत मार्सेबिरुद्धको खेलमा खराब व्यवहार प्रर्दशन गरेको भन्दै डी मारियालाई चार खेलको प्रतिबन्ध लगाईएको हो ।

डी मारियाले मार्सेका डिफेन्डर अल्भारो गोन्जालेजलाई थुकेको आरोप लगाईएको थियो । सो खेलमा नेयमार सहित ५ खेलाडीले रातो कार्ड पाएका थिए ।

नयाँ सिजन सुरु हुनु अघि डी मारिया सहित पीएसजीका ७ खेलाडीलाई कोरोना पोजेटिभ देखिएको थियो । लिगले डी मारियाको प्रतिबन्धमा थुकेको बिषय उल्लेख गरेको छैन ।

म्यान्चेष्टर युनाईटेडका पूर्व मिडफिल्डर डी मारिया कोरोनाबाट पार पाउँदै लिग वानको नयाँ सिजनमा फर्किएका थिए । भिडियो सहायक रेफ्रीले गोन्जालेजसंग भएको घटनामा डी मारियालाई कारबाही गरेका थिएनन् । सो खेलमा पीएसजी १–० ले पराजित बनेको थियो ।