५८ बर्षपछि हुम्लामा भेटियो ११ नम्बर पिल्लर !

८ असोज, काठमाडौं । नेपाल चीन सीमा विवाद अन्तर्गत ५८ बर्षपछि हुम्लामा पर्ने ११ नम्बर पिल्लर फेला परेको छ। हुम्लाका प्रमुख जिल्ला अधिकारी चिरिञ्जीवी गिरीको नेतृत्वमा खटिएको सीमा निरीक्षण टोलीले गरेको अध्ययन अनुसन्धानका क्रममा नाम्खा गाउँपालिका वडा नम्बर ६ लिमीको माथि ताकु लेकमा ११ नम्बरको पिल्लर भेट्टिएको हो ।

गाउँपालिका अध्यक्ष विष्णु लामाका अनुसार २०१९ सालमा गाडिएको उक्त पिल्लर रहेको ठाउँ समुन्द्री सतहबाट ५ हजार २ सय २० मिटर उचाइमा छ। त्यहाँ पुग्न हिल्साबाट ६ घण्‍टा लाग्छ। २०६४ सालदेखि हराएको पिल्लर सशस्त्रले खोजिरहे पनि भेटिएको थिएन । तर अहिले प्रमुख जिल्ला अधिकारीकै नेतृत्वमा खटिएको टोलीले भने पिल्लर भेटिएको छ ।

सीमामा पर्ने लाप्चा क्षेत्रमा चिनियाँ पक्षले एकतर्फी रुपमा ९ वटा भवन बनाएको सार्वजनिक भएपछि सो भूमिको निर्क्यौल गर्न नेपाली पक्षले पिल्लरको खोजीलाई तीव्र बनाएको थियो।

शनिवार सीडीओ गिरीको नेतृत्वमा सशस्त्र प्रहरी डीएसपी मोहन विष्ट, नेपाल प्रहरी, नेपाली सेना, राष्ट्रिय अनुसन्धानका अधिकारीहरुको टोली जिल्ला सदरमुकाम सिमिकोटबाट सीमा निरीक्षण तथा पिल्लर खोज्न हिँडेको टोलीले पिल्लर भेट्टाएरै छाडेको हो ।

पिल्लर भेटिएपछि अब चीनले नयाँ बनाईरहेको भवन नेपालतिर पर्छ वा चीनतिर पर्छ भन्ने एकिन हुनेछ । नेपाल सरकारले भने चीनले बनाईरहेको भवन उसकै भूमिमा रहेको बताइसकेको छ । तर हुम्लाका जनप्रतिनिधिले भने चीनले नेपाली भूमि अतिक्रमण गरेर भवन बनाएको बताउँदै आएका छन् ।