दुई दिन बिदा दिएर कर्मचारीलाई घुम्न पठाउने प्रस्ताव मन्त्रिपरिषदमा !

८ असोज, काठमाडौं । हप्तामा दुई दिन बिदा दिएर कर्मचारीलाई घुम्न पठाउने संस्कृति, पर्यटन तथा नागरिक उड्डयन मन्त्रालयको प्रस्ताव मन्त्रिपरिषद बैठकमा पेश गर्ने तयारी भएको छ । आन्तरिक पर्यटन प्रर्वद्धन गर्न हप्तामा दुई दिन विदा दिने प्रस्ताव तयार गरी मन्त्रिपरिषदमा पेश गर्ने तयारी भएको पर्यटनमन्त्री योगेश भट्टराईले जानकारी दिए ।

मन्त्रालयमा बिहीबार बसेको उच्चस्तरीय समूहको बैठकले हप्तामा दुई दिन विदा दिने सम्बन्धमा अध्ययन तथा कार्यदल बनाउने र कार्यदलले प्रस्ताव तयार पारिसकेपछि मन्त्रिपरिषदमा पेश गर्ने निर्णय गरेको हो ।

पर्यटन मन्त्रालयका सहसचिव तथा पर्यटन महाशाखाका प्रमुख प्रदीपकुमार कोईरालाको संयोजकत्वमा पर्यटन विभागकमा प्रमुख रुद्रसिंह तामाङ र नेपाल पर्यटन बोर्डका प्रमुख कार्यकारी निर्देशक धनन्जय रेग्मी सदस्य रहेको एक समिति निर्माण गरिएको छ । समितिमा अर्थ मन्त्रालय, गृह मन्त्रालय र सामान्य प्रशासन मन्त्रालयका प्रतिनिधिलाई समेत सामेल गरेर अध्ययन प्रस्ताव तयार गरिने भएको हो ।

नेपाल पर्यटन बोर्डले निजी क्षेत्रसमेतको सहयोगमा अहिले आन्तरिक पर्यटन प्रवर्द्धनको योजना बनाइरहेको छ । जसमा सातामा दुई दिने सार्वजनिक बिदाको प्रस्ताव गरिएको छ । धेरैको यसको समर्थन गरेपनि केहीले भने विरोध गरेका छन् ।