विराट कोहलीलाई १२ लाख जरिवाना

९ असोज, एजेन्सी । आईपीएलले रोयल च्यालेन्जर्स बैंगलोरका कप्तान विराट कोहलीलाई १२ लाख भारतीय रुपैयाँ जरिवाना गराएको छ । गएराती किंग्स इलेभेन पञ्जाबविरुद्ध स्लो ओभर रेटमा बलिङ गरेको अभियोगमा कोहलीलाई १२ लाख जरिवाना गरिएको भारतीय सञ्चारमाध्यमले जनाएका छन ।

कोहलीको टिम बेंग्लोर बिहीबार राती पञ्जाबसँग ९७ रनले पराजित भएको थियो । सो खेलमा १ सय ३२ रनको शतकीय इनिङ खेलेका लोकेश राहुलका दुई क्याच कोहलीले छाडेका थिए । १७ र १८ औ ओभरमा सुन्दर क्याच आएपनि कोहलीले छाडेपछि समर्थक आक्रोशित भएका थिए ।

राहुलले शतक नबनाउँदै क्याच आउट हुने मौका कोहलीले गुमाएपछि पाएको जीवनदानमा विष्फोटक व्याटिङ गरेका थिए । जवाफी व्याटिङ गर्न पुगेका कोहली भने १ रनमै आउट भएका थिए । उनको टिम १ सय ९ रनमै अलआउट भएको थियो । पहिलो खेलमा भने बेंग्लोर विजयी बनेको थियो ।