धरानमा कोरोनाले दुई संक्रमितको मृत्यु

९ असोज, काठमाडौं । धरानको वीपी कोइराला स्वास्थ्य विज्ञान प्रतिष्ठानमा दुई जना कोरोना संक्रमितको मृत्यु भएको छ । सप्तरीको राजविराज ३ का ७० वर्षीय पुरुष र मोरङको कानेपोखरी १का ५५ वर्षीय पुरुषको उपचारको क्रममा बिहीबार राति मृत्यु भएको अस्पतालले जनाएको छ ।

भदौ २८ गते स्वास्थ्य विज्ञान प्रतिष्ठानमा भर्ना भएका ७० वर्षीय पुरुषको उपचारको क्रममा बिहीबार राति ११ बजे मृत्यु भएको हो । उनलाई निमोनिया भएको थियो भने ज्वरो आउनुका साथै खोकी पनि लागेको थियो ।

भदौ २५ गते कोरोना पुष्टि भएपछि राजविराजस्थित गजेन्द्र नारायण सिंह अस्पतालले रेफर गरेका उनको बिहीबार राती धरानमा मृत्यु भएको हो । यस्तै मोरङको कानेपोखरी १का ५५ वर्षीय पुरुषको उपचारको क्रममा बिहीबार राति उपचारको क्रममा मृत्यु भएको स्वास्थ्य प्रतिष्ठानले जनाएको छ ।

असोज ५ गते स्वास्थ्य विज्ञान प्रतिष्ठानकै आईसीयू कक्षमा भर्ना भएका उनको आन्द्रामा क्यान्सर भएपछि अपरेशन गरिएको थियो । अपरेशन पश्चात उपचारकै क्रममा उनमा कोरोना संक्रमण पुष्टि भएको थियो ।

अपरेशन पश्चात ज्वरो आउने, खोकी लाग्ने, श्वासप्रश्वासमा समस्या देखिनुका साथै निमोनियाको समेत लक्षण देखिएको उनको कोरोनाले मृत्यु भएको हो ।