एक साताका लागि कञ्चनरुप नगरपालिका बन्द

◊ धीरुभाइ

९ असोज, सप्तरी । सप्तरीको कञ्चनरुप नगरपालिकाले शुक्रबारदेखि सबै सेवाहरु एक साताको लागि बन्द गरिएको छ । सो पालिकाको एक कार्यालय सहयोगीमा कोरोना संक्रमण पुष्टि भएपछि सेवाहरु बन्द गरेको हो ।

शुक्रबार नगरपालिकाले एक सूचना जारी गर्दै एक कर्मचारीमा कोरोना संक्रमण पुष्टि भएको र कार्यालय सिल गर्नुपर्ने अवस्था भएकोले शुक्रबारदेखि आगामी १५ गते सम्मका लागि प्रवाह हुने सम्पूर्ण सेवाहरु बन्द गरिएको जनाएको छ । एकसातासम्म नगरपालिकाको शिक्षा स्वास्थ्य, पशुसेवा कृषि र वडा नं. ८ बाट हुने सम्पूर्ण सेवा बन्द रहने बताइएको छ ।

राजविराज स्थित गजेन्द्र नारायण सिंह अस्पतालको कोभिड–१९ प्रयोगशालामा गरिएको परीक्षणमा कञ्चनरुप नगरपालिकामा कार्यरत कार्यालय सहयोगी राजविराज १५ निवासी ४५ वर्षीय पुरुषमा बिहीबार कोरोना संक्रमण पुष्टि भएको स्वास्थ्य शाखा सह संयोजक डम्बर गुप्ताले बताए ।

थप एक जना कार्यालय सहयोगीमा कोरोनाको लक्षण देखिएकोले उनको स्वाब संकलन गरेर पीसीआर परीक्षणको लागि प्रादेशिक प्रयोगशाला जनकपुर पठाइएको उनले बताए । कार्यालय सहयोगीलाई ज्वरो, सर्दी जस्ता लक्षण देखिएको बताइएको छ ।

यससँगै सो नगरपालिकामा हालसम्म संक्रमितको संख्या ३६ पुगेको छ भने २१ जना निको भएर घर फर्किसकेको उनले बताए । १५ जना सक्रिय संक्रमितमध्ये कार्यालय सहयोगीसहित पाँच जना नगरपालिकाले वार्ड नम्बर ११ स्थित दुर्गा आधारभूत विद्यालयमा सञ्चालन गरेको आइसोलेसनमा र १० जना होम आइसोलेसनमा रहेको बताइएको छ । संक्रमित सबैको स्वास्थ्य अवस्था सामान्य रहेका छन ।