उद्योग वाणिज्य महासंघलाई मंसिरमा साधारणसभा गर्न अनुमति

९ असोज, काठमाडौं । सरकारले नेपाल उद्योग वाणिज्य महासंघलाई साधारणसभा गर्न अनुमति दिएको छ । आगामी मंसिरमा महासंघको साधारणसभा एवं चुनाव गर्न गृह मन्त्रालयले अनुमति दिएको महासंघका वरिष्ठ उपाध्यक्ष शेखर गोल्छाले बताए ।

गृह मन्त्रालयले विद्युतीय माध्यमबाट साधारणसभा गर्न र निर्वाचनको मतदान गर्दा एक पटकमा २५ जनाभन्दा बढी जम्मा नहुनेलगायत स्वास्थ्य तथा सुरक्षा मापदण्ड पूर्णरुपमा पालना गर्ने गरी गर्न अनुमति दिएको गोल्छाको भनाई छ । यससँगै महासंघको चुनाव मंसिर दोस्रो साता हुने पक्का जस्तै भएको छ ।

बरिष्ठ उपाध्यक्ष गोल्छाले अब छिट्टै नै साधारणसभा र चुनावको मिति तोकिने पनि बताए । उनले स्वास्थ्य मापदण्डको सम्बन्धमा सरकारले तत्कालीन समयमा जारी गरेका मापदण्डलाई पूर्णरुपमा पालना गर्ने र आवस्यक परेमा ३ देखि ४ वटा ठाउँबाट दुई दिनसम्म गरेर भए पनि चुनाव गरिने बताएका छन् ।

महासंघले आगामी मंसिर दोस्रो साता साधारणसभा एवं चुनाव गर्नका लागि गृह मन्त्रालयसँग स्वीकृति माग्दै पत्र पठाएको थियो । सोही पत्रको जवाफ दिदै मन्त्रालयले सरकारले जारी गरेको स्वास्थ्य सुरक्षाका मापदण्ड पूर्णरुपमा पालना गरी चुनाव गर्न सहमति दिएको हो ।

महासंघले यसअघि दुई पटक साधारणसभाको मिति तोकेपनि कोरोनाका कारण स्थगित गर्दै आएको थियो । यसपटकको साधारणसभामा वरिष्ठ उपाध्यक्षका लागि चन्द्र ढकाल र किशोर प्रधानको समूह चर्को प्रतिष्पर्धामा छ । वरिष्ठ उपाध्यक्ष नै अर्को पटक स्वतः अध्यक्ष हुने भएकाले नेतृत्वका लागि उपाध्यक्षमै चर्को प्रतिष्पर्धा हुने गरेको हो ।