नार्कमा कार्यकारी निर्देशक नियुक्त गरेर टुंगियो मन्त्रिपरिषद बैठक

११ असोज, काठमाडौं । मन्त्रिपरिषद् बैठक सम्पन्न भएको छ । बालुवाटारमा बसेको मन्त्रिपरिषद बैठक केहीबेरअघि मात्रै सम्पन्न भएको हो । तर आजको बैठकमा मन्त्री हेरफेरको विषयमा कुनै कुरा नभएको बताइएको छ ।

मध्यान्ह १२ बजे भनिएपनि साढे १ बजे शुरु भएको मन्त्रिपरिषद बैठकमा मन्त्री हेरफेरबारे कुनै कुरा नभएको एक मन्त्रीले बताएका छन् । आजको बैठकले नेपाल कृषि अनुसन्धान परिषद नार्कको कार्यकारी निर्देशकमा दीपक भण्डारीलाई नियुक्त गरेको छ ।

यसबाहेक सामान्यखाले निर्णय गरेर मन्त्रिपरिषद बैठक टुंगिएको बालुवाटारबाट मन्त्रीहरुले बताएका छन् । मन्त्रिपरिषद बैठकका निर्णयहरु सरकारले पत्रकार सम्मेलन गरेरै सार्वजनिक गर्ने गरेको छ । आजको बैठकका निर्णयहरु पनि पत्रकार सम्मेलनमार्फत नै सार्वजनिक हुने अनुमान गरिएको छ ।

आजको बैठकमा मन्त्री हेरफेरको विषयमा चर्चा नहुनुले मन्त्री बन्ने र हट्ने नामका विषयमा प्रधानमन्त्री केपी शर्मा ओली र नेकपाका कार्यकारी अध्यक्ष पुष्पकमल दाहाल प्रचण्डबीच सहमति भइनसकेको देखिएको छ ।