दमक कांग्रेस उजिल्याउन युवा नेता रिजालको नेतृत्व आवश्यक

११ असोज, झापा । दमक कांग्रेस शिथिल हुनुमा नवप्रवेशीहरुको हात रहेको आरोप युवानेता पर्शुराम रिजालले लगाएका छन् । कुनै समय झापा जिल्ला कै राजनीतिको केन्द्रबिन्दूको रुपमा रहेको दमक कांग्रेस अहिले राजनीतिक गतिविधि शुन्य अवस्थामा आईपुगेको छ ।

स्थानीय निकायको निर्वाचनमा ब्यहोर्नु परेको लज्जाजनक हारले दमक कांग्रेसको छवि झनझन् अधोगतितर्फ अगाडि बढीरहेको दमककै बयोबृद्ध, निष्ठावान, त्यागी र राजनीतिक गतिविधिबाट दिक्क भएर बसेका स्थानीय नेताहरुको टिप्पणी रहँदै आएको छ ।

दमक पूर्वी नेपालको अतिनै रमणिय, सुन्दर र शान्त नगरको रुपमा अवस्थित स्थान हो । पहाड र मधेशको संगमस्थलको रुपमा रहेको दमक थोरै क्षेत्रफलमा धेरै सम्भावनाहरु बोकेको शहर पनि हो । कुनै समय दमक कांग्रेस प्रजातन्त्रका सेनानी स्व. मुगाधन राई, डा. गोपालप्रसाद कोईराला, प्रजातन्त्रका पर्याय अभिभावक पूर्णानन्द शर्मा, निडर र हक्की स्वभावका धनी स्व. काजीशेर देवान, वरिष्ठ साहित्यकार तथा समालोचक साथै महामानव विश्वेश्वरप्रसाद कोईरालाका प्रेस संयोजकका रुपमा समेत काम गरेका डा. तुलसीप्रसाद भट्टराईकाे नेतृत्वमा क्रियाशिल  थियाे ।

त्यस्तै चन्द्रपसाद अधिकारी, होमबहादुर नेपाल, पदम कोईराला, युवानेता ओलाङ्गचुङ्ग देवान, मानबहादुर भुजेल, राजकुमार भट्टराई, धनपति भट्टराई, बिष्णु साङ्गपाङ्ग, गीता भट्टराई, बिष्णु पोर्तेल, डिल्ली शिवाकोटी, यामनाथ दाहाल, डिल्ली सुब्बा, जीतबहादुर केरुङ्ग, रामप्रसाद सिग्देल, महाबिर अग्रवाल, रामप्रसाद मिश्र, सुरेश सुब्बा लगायतको सामुहिक नेतृत्वमा क्रियाशिल दमक कांग्रेस किन अहिलेको अवस्थासम्म आईपुग्दा निरन्तर क्षयीकरणको अवस्थामा आईपुग्यो ? भनेर दमक कांग्रेसले अहिलेसम्म कुनै कोषबाट पनि समीक्षा गर्न चाहेको देखिदैन् ।

प्रा.डा. दुर्गा दाहाल, प्रा. मोहन भण्डारी, शिक्षाविद् हरीबहादुर राई लगायतको प्रशिक्षणमा प्रशिक्षित तत्कालिन युवा कांग्रेस तथा नेपाल बिद्यार्थी संघका होनहार युवाहरु कसरी समयको कालखण्डसँगै अन्यत्रै बिलय भएर गए ? भनेर अहिलेसम्म कसैले चर्चासम्म गरेको पाईदैन । किनभने नेपाली कांग्रेस दमकलाई यस्ता होनहार युवा तथा पुराना अभिभावक नेतृत्व नै चाहिदैन ।

यसको स्थानमा बरु कुनै अमुक राजनीतिक दलबाट राजनीतिक भागबण्डाको आधारमा पार्टीभित्र भित्र्याईएका राजनीतिक नेताहरुबाट पनि नेपाली कांग्रेस दमकलाई कुनै आकाश खस्ला झैं गरेर फाईदा पुग्छ कि भनेको कुराले पनि खाँसै लछारोपाटो लाएन । राजनीतिक मियो बन्ने संभावना बोकेका राजनीतिक व्यक्तित्वहरुबाट सामान्य टेको समेतको भरपर्ने अवस्था नदेखिएपछि दमक कांग्रेसका पुराना नेताहरु बिस्तारै राजनीतिक बिश्रामको यात्रामा लाग्ने देखिदैछ ।

जसको परिणाम नेपाली कांग्रेस दमकले विभिन्न चरणका निर्वाचनमा भोग्नु परेको लज्जाजनक हारले देखाईरहेको छ । यस बिषयमा पार्टीभित्र गतिलो बहस हुन किन हुन सकिरहेको छैन ? पार्टी संगठन विभागले यसलाई किन गम्भिरताका साथ लिने गरेको छैन ? भनेर अहिले दमक कांग्रेसमा चर्चा समेत हुन थालेको छ । आगामी महाधिवेशनबाट आउने नेतृत्वले यस बिषयलाई अत्यन्तै गम्भिरताका साथ लिएर सांगठनिक बिस्तारमा आफ्नाे सम्पूर्ण ध्यान केन्द्रित गर्नु आवश्यक देखिन्छ ।

वर्तमान दमक कांग्रेसको नेतृत्व हेर्दा व्यक्तिगत गुट र व्यक्तिगत स्वार्थभन्दा माथि उठेर पार्टीको संगठन बिस्तारमा अहोरात्र खटने जुझारु नेतृत्व भेट्टाउन मुस्किल छ । निष्ठाको राजनीति बिस्तारै हराउँदै गैरहेको छ । केही पाखुरेहरु पार्टीभित्र प्रवेश गरेपछि निष्ठावान र ईमान्दार नेता तथा कार्यकर्ताहरु बिस्तारै पार्टीबाट हराउँदै गैरहेका छन् । प्रतिपक्षको एजेण्डा बोकेर हिडेको भनेर स्वयं नेपाली कांग्रेसकै नेताहरुलाई दोषारोपण गर्नेहरुको संख्या पनि बढीरहेको छ ।

यसले नेपाली कांग्रेसकै शाख खस्कने र पार्टीलाई नै घाटा हुने निश्चित छ । नेतृत्वमा बस्ने नेताहरुले आफ्ना दलमा आस्था राख्ने कार्यकर्ताहरुलाई संरक्षण दिने, समस्यामा परेको अवस्थामा बोलिदिने, अप्ठ्यारोमा परेको बेला सहयोगी बनिदिने अवस्थाबाट सधैं भाग्ने परिपार्टीले दमक कांग्रेसमा नाम मात्रको नगर र वडा समितिहरु बन्दै गैरहेको देखिन्छ ।

दमक कांग्रेसलाई त्राण भर्न सक्ने, आम दमकबासीको अभिभावक बन्नसक्ने, जुझारु, निडर र सक्रिय युवा नेताको अहिले आवश्यकता परिरहेको छ । यहि कुरालाई आफ्नाे नेतृत्वकालको मुलमन्त्रका रुपमा लिएर युवानेता पर्शुराम रिजाल दमक कांग्रेसको शाख जोगाउन अगाडि बढीरहेका छन् । युवानेता रिजालले सिंगो नेपाली कांग्रेसको नेतृत्वलाई एकाकार गर्दै ३ वटा कुराहरुलाई बिशेष जोडका साथ उठाउदै आएका छन् ।

पहिलो वर्तमान नेतृत्वलाई केन्द्रदेखि नगर र गाउँसम्म परिवर्तन गरेर नयाँ उर्जाशिल युवाहरुलाई नेतृत्वमा ल्याउने, दोश्रो दमक कांग्रेसलाई एकढिक्का बनाएर सांगठनिक बिस्तारमा बिशेष ध्यान दिनुपर्ने र तेश्रो अहिलेको प्रतिपक्षमा रहेको नेपाली कांग्रेसलाई सवल, सक्षम र आम नागरिकको विश्वासको केन्द्र बनाउँदै आगामी निर्वाचनमा केन्द्रदेखि नगर र गाउँसम्म निर्वाचित बनाउदै नेतृत्व तहमा रहेर जनताका बिकास निर्माण र सिंगो मुलुक निर्माणको काममा लाग्नसक्ने बनाउन आवश्यक रहेको युवानेता रिजाल बताउँछन् ।

कांग्रेसभित्र देखिएको फोहोरमैला सफा गरेर कांग्रेस उजिल्याउने अभियानका प्रणेता, झापा जिल्लाले नै अत्यन्त ठूलो आशा बोकेको, दमक कांग्रेसले एकैस्वरले रोजेको एक आशावादी युवानेता हुन पर्शुराम रिजाल । जोसँग पार्टी भित्रका आन्तरिक द्धन्द्धहरुलाई समाधान गर्दै सिंगो दमक कांग्रेसको छवि उच्च पार्ने नविनतम योजनाहरुको खाका समेत रहेको छ ।

सिंगो दमकको बिकास गर्ने योजनाका खाकाहरुको बिशाल भण्डार लिएर अगाडि बढीरहेका युवा नेता रिजाललाई नेपाली कांग्रेस दमकले यसपटक कुनैपनि गुट÷उपगुटको प्रवाह नगरी सिंगो नेपाली कांग्रेसको नेतृत्व गर्ने युवा तथा जुझारु नेता पर्शुराम रिजाललाई जिताउनु परेको छ ।