पुनर्गठनमा बढ्यो सकस : ओली र प्रचण्डबीचकाे छलफल निष्कर्षबिहीन

१२ असोज, काठमाडौं । मन्त्रीमण्डल पुनर्गठनको विषयमा नेकपाका दुई अध्यक्षबीच सहमति नजुट्दा आजकाे छलफल पनि निष्कर्षबिहीन  हुन पुगेकाे छ । गएको विहिबारदेखि नै प्रधानमन्त्रीसमेत रहेका पार्टी अध्यक्ष केपी ओली र अर्का अध्यक्ष पुष्पकमल दाहाल प्रचण्डबीच घनीभूत रुपमा छलफल जारी छ । तर कसले कुन मन्त्रालय लिने भन्ने विषयमा विवाद भएकाले पुनर्गठन रोकिएको छ ।

प्रधानमन्त्री ओली शनिबार नै पुनर्गठन गर्ने पक्षमा थिए, तर प्रचण्डले केही महत्वपूर्ण मन्त्रालयमा दाबी गरेपछि सहमति जुटेन – बालुवाटार निकट स्रोतले भन्यो । प्रचण्डले सञ्चार तथा सूचना प्रविधि मन्त्रालयमा दाबी गरेकाले सहमति जुट्न सकेको छैन – स्रोत भन्छ । साथै, केही मन्त्रीहरुका बारेमा पनि ओली र प्रचण्डबीच सहमति हुन सकेको छैन ।

प्रचण्डजी धेरै जसो मन्त्री फेर्ने पक्षमा छन् तर ओली भने केही मन्त्री मात्रै हटाएर खाली ठाउँमा मात्रै नयाँ राख्ने अडान लिइरहेका छन् । यही विषयमा सहमति जुट्न सकेको छैन । आज पनि अध्यक्षद्वयबीच बालुवाटारमा यही विषयमा छलफल भएपनि सहमति भने हुन सकेन् ।

स्रोतका अनुसार, प्रचण्डले  २ बर्ष पुराना सबैलाई हटाएर नयाँलाई मौका दिन भनेका छन् । त्यसो गर्दा गृहमन्त्री रामबहादुर थापालाई हटाउन सहज हुने बुझाई उनको रहेको छ । तर ओली भने सचिवालय सदस्यसमेत रहेका थापालाई चलाउने पक्षमा छैनन् ।

हिजो भएको वार्तामा ओलीले श्रममन्त्री रामेश्वर राय यादव, खानेपानी मन्त्री बीना मगर, स्वास्थ मन्त्री भानुभक्त ढकाल र खेलकुद मन्त्री जगत विश्वकर्मालाई हटाउन चाहेको बताएका थिए । तर प्रचण्डले भने व्यक्ति नै तोकेर हटाउने वा राख्ने काम नगरौं भन्दै निश्चित मोडालिटी बनाउँदा सजिलो हुने तर्क गरे ।

तर ओलीले प्रधानमन्त्रीलाई सहज हुने गरी काम गर्न दिनुपर्ने भन्दै व्यक्ति नै तोक्न आग्रह गरे । त्यसपछि प्रचण्डले ओलीले भने भन्दा अरु पनि नाम सुझाए । जसमा गृहमन्त्री थापा, आपूर्तिमन्त्री लेखराज भट्ट र भूमिसुधार मन्त्री पद्मा अर्याललाई समेत हटाउन सुझाव दिए ।

ओलीले प्रचण्डको प्रस्तावमा सहमति जनाएनन् । भोलि कुरा गरौंला भनेर दुुबै नेता हिजो उठे– स्रोतले भन्यो । आजको छलफल पनि यसैमा केन्द्रित भयाे । तर कुनै सहमति हुन सकेन् ।