सुनिलले केएमसीमा १९९९ र नोबेलमा १५५० रुपैयाँमा पीसीआर थालेपछि मन्त्री ढकाल तनावमा

१३ असोज, विराटनगर । मोरङको विराटनगरमा रहेको नोबेल शिक्षण अस्पतालले १५५० रुपैयाँमै कोरोनाको पीसीआर परीक्षण थालेको छ । एक महिनादेखि नै ल्याब किनेर अनुमतिका लागि प्रक्रिया थालेको नोबेलले सोमबारदेखि सस्तो मूल्यमा परीक्षण थालेको हो । सुनिल शर्माको नोबेल अस्पतालले सस्तोमा परीक्षण थार्न थालेपछि स्वास्थ्यमन्त्री भानुभक्त ढकाललाई भने तनाव थपिएको छ ।

मोरङ ३ मा ढकालले शर्मालाई हराउदै चुनाव जितेका थिए । तर भानुभक्त ढकाल भने स्वास्थ्यमन्त्री बनेर भ्रष्टाचारमा चुर्लुम्म डुबेका छन् । आफ्नै निर्वाचन क्षेत्रमा सुनिल शर्मा भने सस्तोमा नागरिकको पीसीआर परीक्षण गरिरहेका छन् ।

 राष्ट्रिय जनस्वास्थ्य प्रयोगशालाबाट परीक्षणको अनुमति आएसँगै सस्तोमा पीसीआर परीक्षण थालिएको नोबेल शिक्षण अस्पतालका सञ्चालक डा. सुनिल शर्माको भनाई छ । अस्पतालमा ल्याइएका दुई वटा अध्याधुनिक मेशिनबाट परीक्षण थालिएको हो ।

दुई वटा पीसीआर मेसिन भएकाले एक दिनमा दुई हजार स्वाब परीक्षण गर्न सकिने र ५ घण्टाभित्र रिर्पोट दिन सकिने नोबेलका वरिष्ठ ल्याब अधिकृत गणेशकुमार सिंहले जानकारी दिए ।

नोबेलले अहिलेसम्मकै सस्तो मूल्यमा पीसीआर परीक्षण थालेको हो । सरकारले दुई हजार रुपैयाँमा पीसीआर परीक्षणको मूल्य तोकेपनि निजी अस्पतालले भने झण्डै ४ हजार रुपैयाँमा परीक्षण गरिरहेका छन् । तर यस्तो महामारीको बेला जनतालाई मार पर्ने गरी धेरै शुल्क लिन नहुने भन्दै नोबेलका सञ्चालक सुनिल शर्माले १५ सय ५० रुपैयाँमा पीसीआर परीक्षण थालेका हुन् ।

यस्तै काठमाडौंको सिनामंगलमा रहेको काठमाडौं मेडिकल कलेज केएमसीले भने १९९९ रुपैयाँमै पीसीआर परीक्षण गरिरहेको छ । अरु निजी मेडिकल कलेज तथा अस्पतालले ४ हजार ४ सय रुपैयाँमा परीक्षण गरिरहदा केएमसीले भने १९९९ रुपैयाँमै परीक्षण थालेको हो ।

केएमसीका समेत प्रबन्ध निर्देशक रहेका सुनिल शर्माले सस्तोमा पीसीआर परीक्षण गरे महामारीमा जनतालाई राहत दिइएको बताएका छन् । शर्मा सञ्चालक रहेको विराटनगरको नोबेलले १५५० र केएमसीले १९९० मा परीक्षण गर्दा धुलिखेल, स्टार, बी एण्ड बी लगायतका अस्पतालले भने ४ हजार ४ सय रुपैयाँमा परीक्षण गरिरहेका छन् ।

अरु अस्पतालले महंगो लिँदा पनि अनुगमन गर्न नसकेको र शर्माले भने सस्तोमै पीसीआर परीक्षण थालेपछि स्वास्थ्यमन्त्री भानुभक्त ढकाललाई थप तनाव बढेको हो ।