पेट्रोलमा मट्टितेल मिसाउन ट्यांकर चालक पक्राउ

१३ असोज, काठमाडौं । पेट्रोलमा मटितेल मिसावट गर्ने एक जना टयांकर चालक पक्राउ परेका छन् । निगमको थानकोट डिपोमा भारतको बरौनीबाट २० हजार लिटर पेट्रोल लोड गरेर आएको ना ४ ख ३०८५ नम्बरको ट्याकंरका चालक सतिन सुवेदी पक्राउ परेका हुन् ।

पेट्रोलमा मिसावट गर्नेविरुद्ध निगमले चलाएको अप्रेसनमा मंगलबार पुनः एक जना पक्राउ परेको निगमका प्रवक्ता विनितमणि उपाध्यायले जानकारी दिए ।
दुई साता अवधिमा पेट्रोलमा मिसावट तथा चोरीमा संलग्न छैटौं ट्यांकर चालक फेला परेको र उनीहरुलाई कालोबजारी ऐनअन्तरगत कारबाही अघि बढाइएको निगमले जनाएको छ ।

यसअघि पेट्रोल चोरीमा संलग्न एक तथा पेट्रोलमा मिसावटको आरोपमा निगमको अमलेखगन्ज डिपोबाट तीन र थानकोट डिपोबाट एक जना चालक पक्राउ परिसकेका छन् ।