रुसबाट ल्याइने कोरोना भाइरसविरुद्धको भ्याक्सिन नेपाल कहिले आउँछ ?

१३ असोज, काठमाडौं । कोरोना भाइरसविरुद्धको भ्याक्सिन रुसबाट आपूर्ति गर्ने सम्झौता भएपनि नेपाल आउन भने समय लाग्ने भएको छ । रसियन डिरेक्ट इन्भेस्टमेन्ट फन्ड आरडीआईएफले नेपाललाई उपलब्ध गराउने स्पुतनिक भी नामको भ्याक्सिनले सबै परीक्षणको चरण पूरा गरि नसकेकाले नेपाल आउन समय लाग्ने भएको हो ।

यद्यपी यो भ्याक्सिन अरुभन्दा प्रभावकारी देखिएको छ । तर यसको प्रयोगका लागि विश्व स्वास्थ्य संंगठनले अनुमति दिनुपर्छ । सबै चरण सफल रुपमा परीक्षण नभए संगठनले अनुमति दिने सम्भावना कम रहन्छ ।

आरडीआईएफले नेपालको औषधि वितरक कम्पनी ट्रिनिटी फर्मास्युटिकल्सलाई २५ मिलियन अर्थात साढे २ करोड ‘स्पुतनिक–भी’ दिन सहमत भएको जनाएको छ । स्पुतनिक–भी कोरोना भाइरसविरुद्धको भ्याक्सिन हो । यो भ्याक्सिन आरडीआईएफको सहयोगमा सञ्चालित गामालेया नेशनल रिसर्ज सेन्टरले उत्पादन गर्दैछ ।

दोस्रो चरणको परीक्षण पुरा हुनासाथ गत साउन अन्तिम साता रुसी राष्ट्रपति भ्लादिमिर पुटिनले कोरोनाविरुद्ध रुसले पहिलो भ्याक्सिन बनाएको घोषणा गरेका थिए । त्यसयता स्पुतनिक–भी चर्चामा छ । तर यसले अझै परीक्षणको सबै चरण पुरा गरिसकेको छैन ।

सबै चरण पूरा गरेपछि विश्व स्वास्थ्य संगठनले अनुमति दिएको खण्डमा यो भ्याक्सिन नेपाल आउनेछ । त्यसपछि नेपाल सरकारले यसको प्रयोगका लागि औपचारिक अनुमति दिनेछ । यसपछि मात्रै यो भ्याक्सिन नेपाल आएर प्रयोगमा आउनेछ । यसका लागि कम्तीमा पनि आउँदो पुस वा माघ महिनासम्म समय लाग्ने अनुमान गरिएको छ ।

त्यसो त त्यतिबेलासम्म कोरोना भाइरसका दशौँ भ्याक्सिन बजारमा आइसक्ने पनि दाबी गरिएको छ ।