बामदेवको सुनुवाइका लागि पूर्ण इजलास गठन

१४ असोज, काठमाडौं । राष्ट्रियसभामा मनोनित नेकपा  उपाध्यक्ष एवं राष्ट्रिय सभाका सदस्य बामदेव गौतमविरुद्ध सर्वोच्च अदालतमा परेको रिटमाथि बुधवारदेखि सुनुवाइ हुँदैछ ।

उपाध्यक्ष गौतमको योग्यतामाथि उठेको प्रश्नबारे सुनुवाइ गर्न सर्वोच्च अदालतले प्रधानन्यायाधीश चालेन्द्रशमशेर जबराको नेतृत्वमा ५ सदस्यीय पूर्ण इजलाश गठन गरेकाे छ । जसमा न्यायाधीशहरु दीपककुमार कार्की, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडा छन् ।

उक्त पूर्ण इजलाशमा अधिवक्ता बद्रीराज भट्ट र वरिष्ठ अधिवक्ता दिनेश त्रिपाठीले दर्ता गरेका छुट्टाछुट्टै निवेदन परेका छन् । त्रिपाठीको निवेदनमाथि सुनुवाइपछि सर्वोच्च अदालतले गत साता गौतमको मनोनयन ‘यथास्थितिमा राख्नु’ भन्ने आदेश गरी थप संवैधानिक जिम्मेवारी नदिनु भनेको थियो ।

पूर्ण इजलाशले दुवैपक्षको तर्क सुनी गौतमको मनोनयनमाथि अन्तरिम आदेश जारी गर्ने वा नगर्ने आदेश गर्नेछ । आदेश जारी गरेमा गौतमले राष्ट्रियसभा सदस्यको जिम्मेवारी पाउने छैनन् भने अन्तरिम आदेश जारी नगरेमा उनले मनोनयन अनुसारको अरु जिम्मेवारी लिन कानुनी रुपमा बाधा पर्नेछैन् ।

राष्ट्रपति विद्यादेवी भण्डारीले गौतमलाई असोज १ गते राष्ट्रियसभाको सदस्यमा नियुक्त गरेकी थिइन् । गौतमले सोही दिन राष्ट्रियसभाको सदस्यको शपथ लिएका थिए ।