मनलाग्दी शुल्क लिने ८ वटा ल्याबलाई सरकारको २४ घण्टे अल्टिमेटम

१४ असोज, काठमाडौं । सरकारले कोरोना परीक्षणको तोकिएभन्दा धेरै शुल्क लिने ८ वटा ल्याबलाई तत्काल शुल्क समायोजन गर्ने निर्देशन दिएको छ । स्वास्थ्य तथा जनसंख्या मन्त्रालयले बुधबार ८ वटा ल्याबलाई शुल्क समायोजन गर्न २४ घण्टे अल्टिमेटम दिएको हो ।

शुल्क समायोजन नगरे पीसीआर ल्याब सञ्चालनका लागि दिइएको स्वीकृति खारेज गर्ने चेतावनी मन्त्रालयले दिएको छ । पछिल्लो समय काठमाडौं उपत्यकासँग विभिन्न जिल्लामा कोरोनाको शुल्क तोकिएभन्दा धेरै लिइने गरेको छ ।

तोकिएको भन्दा महंगो शुल्क लिने स्टार अस्पताल, हृयाम्स अस्पताल, बी एण्ड बी अस्पताल, मेडिसिटी अस्पताललाई सरकारले शुल्क समायोजन गर्न २४ घण्ट अल्मिेटम दिएको छ । यस्तै डिकोड जिनोमिक्स एण्ड रिसर्ज सेन्टर, सौर्य हेल्थ केयर, सेन्ट्रल डायगनोस्टिक र इन्ट्राप्रिड डायगनोस्टिकलाई पनि २४ घण्टाभित्र शुल्क समायोजन नगरे अनुमति नै खारेज गर्ने चेतावनी सरकारले दिएको छ ।

यी ल्याबले संयुक्त रुपमा ३८९९ रुपैयाँ शूल्क तोकेर सर्वसाधारणबाट पैसा उठाउँदै आएका छन् । सरकारले भदौ २८ गते नै पीसीआर परीक्षणको मुल्य २ हजार रुपैयाँ तोकेको छ । तर काठमाडौंका केही अस्पताल र ल्याबले पीसीआर परीक्षणको मूल्य ४ हजार रुपैयाँसम्म लिदै आएका छन् ।