सम्झनालाई बलात्कार गर्ने राजेन्द्र सार्वजनिक, त्रिशुलले हानेर गरेका थिए हत्या

१४ असोज, काठमाडौं । बझाङमा बलात्कारपछि हत्या गरेको अवस्थामा भेटिएकी सम्झनाका कामीको हत्यारालाई प्रहरीले सार्वजनिक गरेको छ । केही दिनअघि पक्राउ परेका राजेन्द्र बोहराले आफूले बलात्कारपछि मन्दिरको त्रिशुलले हानेर सम्झनाको हत्या गरेको स्वीकार गरेका छन् ।

प्रहरीले उनलाई सार्वजनिक गरेको केहीबेरमा नै उनी आफैले बलात्कार गरेपछि पोल खुल्ने डरले हत्या गरेको बताएका हुन् । बझाङ प्रहरी प्रमुख तथा प्रहरी नायब उपरीक्षक रूपक खड्काले पत्रकार सम्मेलन गरिसकेपश्चात राजेन्द्रले आफैँले हत्या गरेको बताएको जानकारी दिए ।

गएको बुधबार बझाङको मष्टा २ खिकालाबासीको पूज्य मन्दिर सिम मन्दिरभित्र अर्धनग्न अवस्थामा सम्झनाको शव भेटिएको थियो । १२ बर्षीया उनको शव अर्धनग्न अवस्थामा भेटिएपछि चौतर्फी विरोध प्रदर्शन भएको थियो । विरोधपछि दबाबमा परेको प्रहरीले एक हप्तापछि अभियुक्त सार्वजनिक गर्न सफल भएको हो ।