धरान र वीरगञ्जमा दुई संक्रमितको मृत्यु

१५ असोज, वीरगञ्ज । धरान र वीरगञ्जमा दुई जना संक्रमितको मृत्यु भएको छ । रौतहटको ईशनाथ नगरपालिका–४ बस्ने ७४ वर्षीय पुरुषको आज विहान वीरगञ्जमा मृत्यु भएको हो । यस्तै धरानमा मृत्यु हुने व्यक्ति सुनसरी इटहरीका हुन् ।

असोज ९ गते कोरोना संक्रमण पुष्टि भएपछि रौटहटका संक्रमितलाई कोरोना अस्पतालमा उपचारका लागि लगिएको थियो । विरामी भएर नारायणी अस्पतालमा उपचारका लागि भर्ना भएका उनको आसोज ८ गते पीसीआरका लागि स्वाब नमुना संकलन गरिएको थियो ।

यस्तै बीपी कोइराला स्वास्थ्य विज्ञान प्रतिष्ठान धरानमा उपचारका क्रममा सुनसरीको इटहरी–६ का ५६ बर्षीय पुरुषको गएराति मृत्यु भएको हो । उनी बिराट मेडिकल कलेज बिराटनगरबाट रिफर भएर प्रतिष्ठानमा आएका थिए ।

उनमा असोज १४ गते नै बिराट मेडिकल कलेजमा कोरोना संक्रमण देखिएको थियो । उनमा ज्वरो, खोकी, श्वासप्रश्वासमा समस्या जस्ता लक्षण थियो । कुनै दीर्घरोग नभएपनि उनको कोरोनाका कारण मृत्यु भएको हो ।