शंकरदास बैरागी बने सरकारको मुख्यसचिव

१५ असोज, काठमाडौं । परराष्ट्र सचिव शंकरदास बैरागी मुख्यसचिवमा नियुक्त भएका छन् । बिहीबार बिहान प्रधानमन्त्री निवास बालुवाटारमा बसेको मन्त्रिपरिषद बैठकले बैरागीलाई मुख्यसचिव बनाउने निर्णय गरेको हो ।

अहिले रहेका मुख्यसचिव लोकदर्शन रेग्मीले राजीनामा दिएलगत्तै सरकारले बैरागीलाई मुख्यसचिवमा नियुक्त गरेको हो । कार्यकाल सकिनु केही दिन बाँकी हुँदा रेग्मीेले राजीनामा दिएका हुन्।

मुख्यसचिव रेग्मीको कार्यकाल अर्को महिना सकिदै थियो । तर उनले राजीनामा दिएपछि सरकारले बैरागीलाई मुख्यसचिवमा नियुक्त गरेको हो । वैरागीसँगै केदार अधिकारी, मोहनकृष्ण श्रेष्ठ मुख्यसचिवको दौडमा थिए ।

तर परराष्ट्रमन्त्री प्रदीप ज्ञवालीको विशेष रोजाईमा बैरागी मुख्यसचिव बनेका हुन् । रेग्मीलाई सरकारले बेलायतका लागि नेपाली राजदूतमा नियुक्त गर्ने निर्णय गरेको छ ।