बाँकेमा संक्रमित पुरुष र महिलाको मृत्यु

१५ असोज, नेपालगञ्ज । बाँकेमा दुई जना संक्रमितको मृत्यु भएको छ। मृतकमध्ये सुर्खेतकी महिला र बाँकेका पुरूष छन्। सुर्खेत जिल्लाको भेरी गंगा नगरपालिका वडा नं. ५ निवासी ७५ बर्षीया महिला र बाँकेको नेपालगञ्ज नगरपालिका वडा नं. ४ निवासी ५२ वर्षीय पुरूषको मृत्यु भएको हो ।

सुर्खेतकी महिलाको बिहीबार राति १ बजे नेपालगञ्ज मेडिकल कलेज शिक्षण अस्पताल कोहलपुरमा मृत्यु भएको अस्पतालले जनाएको छ । असोज ६ गते अस्पतालमा भर्ना भएकी उनलाई असोज ८ गते कोरोना संक्रमण पुष्टि भएको थियो।

उनको लडेर हड्डी भाँचिएको थियो भने पित्तथैली र मिर्गौलाको बिरामी समेत थिइन्। त्यस्तै, नेपालगञ्ज निवासी ५२ वर्षीय पुरूषको बिहीबार बिहान मृत्यु भएको हो ।

उनको पनि दुबै तर्फको फोक्सोमा निमोनिया भएर मृत्यु भएको जानकारी दिइएको छ। योसँगै बाँकेमा कोरोना संक्रमणका कारण मृत्यु हुनेको संख्या २५ पुगेको छ।