भारतमा १५ अक्टुबरबाट सिनेमा हल खुल्ने, नेपालमा कहिले ?

१५ असोज, एजेन्सी । कोरोनाको लकडाउनले ठप्प भएको ६ महिनापछि भारतमा चलचित्र हल खुल्ने भएका छन् । भारतको केन्द्रिय सरकारले अनलक–५ गाइडलाइन बुधबार सार्वजनिक गरेको छ । जस अन्तर्गत अक्टुबर १५ तारिखबाट भारतमा हल खुल्ने भएका हुन् ।

प्रदर्शकले हलको क्षमताको ५० प्रतिशत दर्शक राखेर हल खोल्न पाउनेछन् । यसका लागि केन्द्रिय सरकारले एसओपी सार्वजनिक गर्ने बताएको छ । भारतमा दैनिक ९० हजार कोरोना संक्रमित देखिएपनि केन्द्रिय सरकारले ६ महिनापछि हल खोल्ने निर्णय गरेको हो ।

यसलाई भारतका प्रदर्शकहरुले स्वागत गरेका छन् । यस्तै, बलिउडका कलाकारहरुले पनि यो खबरले उत्साहित भएको उल्लेख गरेका छन् ।

औपचारिक रुपमा १४ दिनपछि हल खुल्ने भएपछि केही हल भने यसअघिदेखि नै सञ्चालन भइसकेका छन् । भारतमा हल खुल्ने समय तोकिदा नेपालमा भने हल कहिले खुल्ने भने अन्यौल कायमै छ । अहिलेसम्म सरकारले नेपालमा सिनेमा हल मात्रै होइन, व्युटीपार्लर, जिमखाना पनि खोल्न दिएको छैन् ।