आज नेकपाका उपाध्यक्ष गौतमविरुद्धको मुद्दामा सुनुवाई हुँदै

१६ असोज, काठमाडौं । नेपाल कम्युनिस्ट पार्टी ‘नेकपा’का उपाध्यक्ष बामदेव गौतमलाई राष्ट्रियसभा सदस्यमा मनोनित गर्ने निर्णयविरुद्ध सर्वोच्च अदालतमा परेको रिटको आज पनि सुनुवाई हुँदैछ ।

प्रधानन्यायाधीश चोलेन्द्रशमशेर राणा नेतृत्वको संवैधानिक इजलासमा आज पनि मुद्दाको सुनुवाई हुन लागेको हो। यसअघि बुधवार भएको सुनुवाईमा कानुन व्यवसायीको बहस नसकिएपछि हेर्दाहेर्दैमा राखिएको थियो।

प्रधानन्यायाधीश राणासहित न्यायाधीशसहरू दीपककुमार कार्की, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडाको संवैधानिक इजलासमा सुनुवाइ हुन लागेको हो।

गौतमको तर्फबाट ३० भन्दा बढी कानुन व्यवसायीले बहस गरिरहेका छन्। गौतमको तर्फबाट बुधबार बहस गर्ने वकिलहरूले गौतमको सिफारिस ठीक रहेको भन्दै जिकिर गरेका थिए।

गौतम पक्षका वकिलहरूको बहस सकिएपछि सरकारी वकिलले बहस गर्नेछन्। त्यसपछि निवेदकले जवाफ दिने समय पाउने छन्। दुवैतर्फका कानुन व्यवसायीको बहस सुनेपछि संवैधानिक इजलासले निर्णय दिने सर्वोच्च अदालतले जनाएको छ।